Ոնց որ ունենաս մի հիվանդ, որի հիվանդության մասին գրքերի մեջ գրված չէ. Գևորգ Կոստանյանը՝ Պերմյակովի գործի մասին

Այսօր ԱԺ նիստում, երբ գլխավոր դատախազ Գևորգ Կոստանյանը ներկայացնում էր գլխավոր դատախազության` 2014թ. տարեկան հաշվետվությունը, «Ժառանգություն» խմբակցության պատգամավոր Զարուհի Փոստանջյանը հարցրեց Պերմյակովի գործի մասին:

Գևորգ Կոստանյանը նշեց, որ չի կարող այս պահի դրությամբ ավելի բան ասել ընթացակարգերի մասին, որ քննությունն իրականացնում է քննչական կոմիտեն, որը «բավական պարտաճանաչ հաղորդագրություններ» է ներկայացնում հանրությանը:

«Քննության արդյունքները բոլորս կգնահատենք, թող քննիչներն իրենց աշխատանքը կատարեն: Վարույթի փոխանցման հետ կապված` էս պահի դրությամբ ես չեմ կարող ավելի բան ասել` մի բան նկատի ունենալով, որ Հայաստանի ու Ռուսաստանի իրավապահների պրակտիկայում աննախադեպ վիճակ է ստեղծվել: Ես ուսումնասիրել եմ տեսությունը, պրակտիկան. ստեղծվել է մի իրավիճակ, երբ անգամ տեսության մեջ նման բան նկարագրված չէ: Շատ կոպիտ ասած` ոնց որ ունենաս մի հիվանդ, որի հիվանդությունն անգամ գրքերի մեջ գրված չէ, ու դրա բուժման մեխանիզմների մասին պետք է քննարկել: Ահա, թե ինչու աննախադեպ վիճակ է Հայաստանի ու Ռուսաստանի իրավապահների համար, և մենք քննարկում ենք, որ լուծումները համապատասխան լինեն միջազգային իրավունքին»,- ասաց Գևորգ Կոստանյանը:

Զարուհի Փոստանջյանը արձագանքեց, որ Պերմյակովի ձերբակալությունը օրինական չի եղել, ինքը հաղորդում է ներկայացրել, որին համապատասխան ընթացք չի տրվել, և պատգամավորը դա վիճարկում է դատարանում: