ՀՀԿ փիլիսոփայությունը՝ ըստ ՀՀԿ մամուլի խոսնակի

Այսօր  կայացած ՀՀԿ ԳՄ նիստում  կադրային փոփոխության, վերանշանակման, նշանակման կամ ազատման հարց չի քննարկվել: Այդ մասին նիստից հետո լրագրողների հետ զրույցում ասաց ՀՀԿ մամուլի խոսնակ, ԱԺ փոխնախագահ Էդուարդ Շարմազանովը:

ՀՀԿ-ն չի քննարկել նաեւ  Սյունիքի մարզպետի ու նրա ընտանիքի անդամների՝ մշտապես միջադեպերի մեջ հայտնվելու հարցը: Էդուարդ  Շարմազանովը անդրադարձավ նաեւ այդ հարցին. «Անկախ նրանից՝ ում որդին, ում հարևանը, բարեկամն է, եթե մարդն անցնում է օրինականության սահմանը, պետք է պատժվի, սա մեր ընդհանուր գնահատականն է»: Միեւնույն ժամանակ ՀՀԿ մամուլի խոսնակը հավաստիացրեց, որ Գորիսի դեպքերի մանրամասներին չի տիրապետում եւ չի պատրաստվում իրավական հարցերին քաղաքական գնահատական տալ:

«ՀՀԿ փիլիսոփայությունն այն է, որ պաշտոնյայի ընտանիքի անդամը պետք է հասկանա, որ պաշտոնը տրված է ո′չ թե վայելքի, այլ՝ պատասխանատվության համար»:

Ի պատասխան լրագրողների հարցին, թե արդյոք ՀՀԿ անդամ չհանդիսացող Վահագն Գեւորգյանի թեկնածությունը Աբովյանի քաղաքապետի ընտրություններում սատարելու  որոշումը բարեկամական քայլ էր Ծառուկյանի հանդեպ, Շարմազանովը կոչ արեց հանգիստ թողնել Ծառուկյանին:

«Ինքը զբաղվում է իր գործունեությամբ, ինքը հայտարարել է, որ դուրս է գալիս քաղաքականությունից: Իրատեսական չէ Աբովյանի իրադարձությունները կապել Գագիկ Ծառուկյանի անվան հետ»,- ասաց Շարմազանովը։