Եթե շատ բացասական լինեն հանրաքվեի արդյունքները, հնարավոր է՝ այլ սցենար լինի. փոխնախարարը՝ համայքների խոշորացման մասին

ԱԺ-ում քննարկվում է ՏԻՄ-ի մասին օրենքում լրացումներ և փոփոխություններ անելու մասին հարցը:

ՀԱԿ խմբակցության ղեկավար Լևոն Զուրաբյանը հարց ուղղեց հիմնական զեկուցող` ՏԿԱԻ փոխնախարար Վաչե Տերտերյանին համայնքների խոշորացման վերաբերյալ: Պատգամավորը հարցրեց` եթե համայնքների խոշորացման վերաբերյալ տեղական հանրաքվեի արդյունքները բացասական լինեն, արդյո՞ք համայնքների խոշորացումը կպարտադրվի տվյալ համայնքին:

Վաչե Տերտերյանը նշեց, որ հանրաքվեի արդյունքների պարտադիր լինելու փաստը սահմանադրության նորմ է: «Մենք չենք հայտարարել, որ եթե համայնքի բնակիչները դեմ քվեարկեն հանրաքվեի ժամանակ, մենք անպայման կշարունակենք գործընթացը: Մենք կտեսնենք, թե բնակչությունն ինչ արձագանք կտա: Ի վերջո, որոշում կայացնողը ԱԺ-ն է լինելու: Ենթադրվում է, որ եթե շատ բացասական կլինեն արդյունքները, ապա այլ սցենար կլինի»,- ասաց նա:

Փոխնախարարը հավելեց, որ կառավարությունը ընդհանուր պատկերացում ունի չորս մարզերի մասին, թե ինչպիսին է լինելու խոշորացումը, և փնջային մեթոդը նախատեսվում է կիրառել Դիլիջանի, Թումանյանի ու Տաթևի համար: Վաչե Տերտերյանի խոսքով՝ համայնքների խոշորացումն արվում է դրանց օգնելու և զարգացնելու համար:

Լևոն Զուրաբյանը հանրաքվեի վերաբերյալ հարցը տվեց նաև հարակից զեկուցող` ՀՀԿ-ական Արայիկ Հովհաննիսյանին: Նա նույնպես պատասխանեց, որ Սահմանադրության կետն իմաստ չունի մեկնաբանելու, և թե ինչպիսին կլինի հանրաքվեի արդյունքը, պարզ կլինի տասն օր հետո, որից հետո կառավարությունը ԱԺ-ին կներկայացնի նախագիծ, որտեղ էլ կծավալվեն քննարկումները: