Սասունում սկսվել են հայկական եկեղեցու վերանորոգման աշխատանքները

Սասունի, Բիթլիսի, Բաթմանի, Մուշի, Վանի և Պոլսի հայկական սոցիալական աջակցության և համերաշխության, նաև Մշակութային միության նախագահ Ազիզ Դաղջըն հայտնել է, որ Սասունում գտնվող Գոմք եկեղեցու վերականգման աշխատանքներն սկսվել են.տեղեկացնում է Haber7-ը:

Խուսափելով մեկնաբանել Հռոմի Ֆրանցիսկոս պապի՝ Հայեց ցեղասպանության վերաբերյալ հայտարարությունները` նա ասել է. «Ճիշտ չի լինի, որ այս թեմայով ինչ-որ մեկնաբանություն անեմ, դա իմ պարտականությունը չէ»:

Նշելով, որ այդ հարցի հետ առնչվողները «մեծերն են»՝ Դաղջըն ասել է. «Սասունում ավելի քան 100 հայկական տուն կա: Ես ցանկանում եմ, որ բոլորը խաղաղության մեջ ապրեն: Ես գնացի ԱՄՆ, ուր մուսուլմանը, քրիստոնյան, հրեան, բոլորն իրար հետ են ապրում: Ես նման խաղաղություն եմ ուզում, քանի որ շատ նեղություններ կրեցինք, բայց այդ ժամանակ էլ մեր մուսուլման եղբայրների հետ եղբոր պես ապրեցինք»:

Նշելով, որ Սասունն իրենց համար կարևոր վայր է, Դաղջըն հավելել է. «Այստեղ շատ լավ մարդիկ կան: Նրանց հետ նույն կրոնը կարող է չունենք, բայց միշտ եղբայրաբար ենք ապրել: Հիմա էլ Գոմք եկեղեցու համար ենք աշխատանքներ սկսել: Եթե իրականանա եկեղեցու վերանորոգումը, Եվրոպայից, ԱՄՆ-ից հազարավոր մարդիկ են գալու: Եթե այսպես լինի, Փարիզին էլ կգերազանցի»: