Սասունում հայկական վանք ու հարակից գերեզմաններ են այրել

Անհայտ անձանց կողմից հրդեհվել է Արևմտյան Հայաստանի Սասուն գավառում գտնվող հայկական Սբ. Պետրոս Առաքյալի վանքն ու հարակից հայկական գերեզմանները:

Ըստ Demokrathaber-ի` Սասունի, Բիթլիսի, Մուշի, Վանի և Կ.Պոլսի հայերի սոցիալական օգնության, համերաշխության մշակութային միությունը այդ կապակցությամբ բողոքի հայց է ներկայացրել Սասունի տարածքային դատախազություն:

Այդ մասին հայտարարությամբ հանդես եկած միության նախագահ Ազիզ Դաղջըն հաղորդել է, որ հրդեհի հետևանքով այրվել են հայ հոգևորականների ոսկորները, որոնք դուրս են թափվել գերեզմանափոսերից գանձ որոնողների կողմից:

Նշելով, որ թուրքական ոստիկանությունը չի ժամանել դեպքի վայր, Դաղջըն ասել է. «Նույն օրը տեղեկացրեցինք Բաթմանի ոստիկանությանը: Ասացին, որ հրշեջներ կուղարկեն: Սակայն հրշեջ մեքենան չի կարող բարձրանալ Սասունի Մեշելի գյուղ, քանի որ եկեղեցի տանող ճանապարհը դեռ բաց չէ: Պետք է շնորհակալություն հայտնենք հրդեհը մարելուն օգնած Մեշելի գյուղի բնակիչներին»: