Սասունում հայկական վանքն ու գերեզմանատները հրդեհելու հարցերով դիմել են Թուրքիայի ՆԳ նախարարին

Թուրքիայի խորհրդարանում Ժողովուրդների դեմոկրատական կուսակցության` Բաթմանից պատգամավոր Ալի Ալթանը մեջլիսի օրակարգ է մտցրել օգոստոսի 15-ին Սասունում հայկական վանքն ու հարակից գերեզմանատները հրդեհելու հարցերը. տեղեկացնում է «Ակօս»-ը:

Պատգամավորը ներքին գործերի նախարարին ուղղված գրավոր հարցադրում է արել խորհրդարանում, թե այդ կապակցությամբ դատական գործ հարուցվե՞լ է, եթե` ոչ, ապա ե՞րբ կհարուցվի:

ՆԳ նախարարին ներկայացված հարցադրման մյուս կետերը ներկայացնում ենք ստորև:

- Վանքի և գերեզմանատների դեմ հարձակումը ռասիստական բնո՞ւյթի է:

- 2015 թվականին «ճանապարհների դեռ փակ լինելու» պատրվակով չժամանած հրշեջ ծառայության պատասխանատվությունը ո՞վ է կրում: Այս անպատասխանատվության հետևանքով առաջացած նյութական և հոգևոր վնասները ո՞վ է փոխհատուցելու:

- 15.08.2015 ամսաթվին տեղի ունեցած այդ հարձակման տեսագրությունն առկա՞ է:

- Մարդկանց համար հոգևոր արժեք ունեցող այդ գերեզմանատների վրա հարձակումները կանխելու նպատակով ինչպիսի՞ գործողություններ եք նախաձեռնում:

Հիշեցնենք, որ նախորդ շաբաթ անհայտ անձանց կողմից հրդեհվել էին Արևմտյան Հայաստանի Սասուն գավառում գտնվող հայկական Սբ Պետրոս առաքյալի վանքն ու հարակից հայկական գերեզմանները: Թուրքական ոստիկանությունն ու հրշեջ մեքենաները չէին ժամանել դեպքի վայր՝ պնդելով, որ չեն կարող բարձրանալ Սասունի Մեշելի գյուղ, քանի որ եկեղեցի տանող ճանապարհը դեռ բաց չէ: Հրդեհը մարելու հարցում օգնել էին Մեշելի գյուղի բնակիչները: