43 երկրի երաժիշտներ հավաքվել են մեր խնդրի` Ցեղասպանության շուրջ. Հովհաննես Չեքիջյան

Վաղը «Վերածնունդ» խորագրով կայանալիք համերգի իր վերջին փորձն է կատարում «24/04» նվագախումբը: Մաեստրո Հովհաննես Չեքիջյանը մեկն է այն դիրիժորներից, ով վաղը ղեկավարելու է նվագախումբը:

Լրագրողների հետ զրույցում մաեստրոն նշեց, որ ֆանտաստիկ գործ է արված` խոշոր կազմակերպչական աշխատանք պահանջող, որն արդեն իսկ հաջողված կարող ենք համարել:

«43 երկրներից եկել են երաժիշտներ` լավագույն երաժիշտներ` լավագույն նվագախմբերից: Նրանք հավաքվել են մեր խնդրի շուրջ և մեզ հետ առաջ են քաշում Ցեղասպանության ճանաչման հարցը: Սա խոշոր երևույթ է նաև արվեստի տեսակետից: Չտեսնված լավ է հնչում նվագախումբը, որովհետև բարձր կարգի երաժիշտներ են»,- ասաց Չեքիջյանը:

Ըստ նրա` տպավորիչ է այն փաստը, որ օտար դիրիժորներ են հրավիրված` մեկը մյուսից լավ, ինչն էլ միջոցառման մակարդակը բարձրացնում է:

Ի դեպ, մաեստրոն ղեկավարելու է նվագախումբը, երբ հնչելու է «Սուրբ-սուրբ»-ը: