Ապրիլի 24-ին Հանրապետության հրապարակում կայանալիք համերգին կմասնակցեն 100 երաժիշտներ 42 երկրից

Աղբյուրը` armeniangenocide100

100 երաժիշտներ աշխարհի 42 երկրից Հայոց ցեղասպանության 100-րդ տարելիցին համերգով կոգեկոչեն զոհերի հիշատակը:

Նվագախումբը, որը կկրի «24/04» անունը, իր առաջին ելույթով կներկայանա ապրիլի 24-ին՝ ժամը 20:15-ին, Երևանի Հանրապետության հրապարակում: Բեմում կլինեն բազում տաղանդավոր հայ և օտարերկրացի երաժիշտներ,  մենակատարներ Մարիա Գուլեգինան, Նարեկ Հախնազարյանը, Գևորգ Հակոբյանը և Սերգեյ Խաչատրյանը, անվանի դիրիժորներ Միխայիլ Յուրովսկին, Ջանլուկա Մարչիանոն, Հովհաննես Չեքիջյանն ու Սերգեյ Սմբատյանը:

«24/04-ի ստեղծման նախաձեռնությամբ Ցեղասպանություն վերապրած ժողովուրդն այսօր հիմք է դնում մասշտաբային հումանիստական ծրագրի, որով ասում է ՈՉ ԲՌՆՈՒԹՅԱՆԸ և կոչ է անում մարդկությանը` դասեր քաղել անցյալի դառը սխալներից, սթափվել՝ հասկանալով, որ այսօր բոլորիս կյանքում իսկապես պակասում է սերը, ներդաշնակությունը և հարգանքը»,– ասվում է Հայաստանի պետական երիտասարդական նվագախմբի տարածած հաղորդագրությունում: