Մեզ լավ հայտնի է խաչ կրելու և խաչ բարձրանալու խորհուրդը. Հովհաննես Չեքիջյան

Ալ. Սպենդիարյանի անվան օպերայի և բալետի ազգային ակադեմիական թատրոնում այժմ 24/04 նվագախմբի համերգն է: Քիչ առաջ 43 երկրի 123 երաժիշտներից կազմված նվագախումբը ղեկավարեց մաեստրո Հովհաննես Չեքիջյանը. հնչեց «Սուրբ-սուրբ» -ը:

Մաեստրոն վերջում հանդես եկավ նաև ելույթով` նշելով, որ, որպես առաջին քրիստոնյա պետության զավակներ, մեզ լավ հայտնի է խաչ կրելու և խաչ բարձրանալու խորհուրդը, և Թուրքիայի կողմից արվում էր ամեն ինչ` հավատը խլելու, կամքը կոտրելու ու մեզ աշխարհից վերացնելու համար:

«Ցեղասպանությունը մշակութային ջարդ էր, ազգի ոչնչացում` մշակութապես, քանզի վերացվեց հարյուրամյակների մշակութային ժառանգությունը: Սա նաև անդառնալի կորուստ է աշխարհի համար, աշխարհաճանաչման բազմաթիվ շերտեր ոչնչացվեցին: Սակայն համազգային ողբերգությունը չկոտրեց մեզ` այն կոփեց, ուժեղացրեց, բարձրացրեց, քրիստոնեական բարոյականն առավել ամրապնդվեց: Նոյ նահապետի տապանը կանգնեց Արարատի գագաթին ու այն մարդկության փրկության խորհրդանիշը դարձավ: Խոնարհվենք այդ սուրբ լեռան առաջ ու ասենք` Աստված մեզ պահապան»,-ասաց մաեստրոն: