Ռուսաստանի 640 քաղաքում Ցեղասպանությանը նվիրված 2000 միջոցառում կանցկացվի

Ռուսաստանի 640 քաղաքում Հայոց ցեղասպանությանը նվիրված ավելի քան 2000 միջոցառում տեղի կունենա: «Ռիա Նովոստի» գործակալության տեղեկացմամբ` այդ մասին Մոսկվայում կայացած ասուլիսի ժամանակ հայտարարել է Ռուսաստանի հայերի միության և Հայերի համաշխարհային կոնգրեսի նախագահ, Ռուսաստանի նախագահին կից միջազգային հարաբերությունների հարցով խորհրդի անդամ Արա Աբրահամյանը։

Նրա խոսքով՝ միայն Մոսկվայում տեղի է ունենալու ավելի քան 30 միջոցառում, այդ թվում՝ ցուցահանդեսներ, կլոր սեղաններ:

«Հարյուրամյա տարելիցի առիթով անցկացվող միջոցառումները կարեւոր են ոչ միայն հայերի համար, դրանք ինքնատիպ հորդոր են՝ կանխել մարդկային արժեքների նմատմամբ ցանկացած ոտնձգություն: Հենց դրա համար ապրիլի 24-ին շատ երկրների ղեկավարներ եւ բարձրաստիճան պաշտոնյաներ կայցելեն Երեւան »,- իր հերթին նշել է ասուլիսի մյուս բանախոսը՝ ԽՍՀՄ եւ ՌԴ հերոս Արթուր Չիլինգարովը: