«Հայաստանում քաղաքական անպտղաբերության որոշակի մակարդակ կա»

Տարածաշրջանային հետազոտությունների կենտրոնի տնօրեն Ռիչարդ Կիրակոսյանն այսօր, «Եվրանեսթ»-ի մարդու իրավունքների հանձնաժողովում ելույթ ունենալով, նշեց, որ ԱլԳ-ն ու եվրոպական գործընկերությունը լուծում չեն Հայաստանի բոլոր խնդիրների համար, բայց լավ միջոց են՝ արձանագրելու այն բոլոր թերություններն ու բացթողումները, որ կան:

«Հայաստանում քաղաքական անպտղաբերության որոշակի մակարդակ կա: Հայաստանում պետք է ունենալ ավելի կայուն լեգիտիմություն, բայց բավական երկար ժամանակ Հայաստանում քաղաքականությունը որոշում են անհատները, և եթե նայում ենք վերջին զարգացումներին, ես մտահոգված եմ, որ մի կուսակցություն ու իր որոշումը դառնում են Հայաստանի քաղաքական կյանքի որոշողը, մինչդեռ մեզ պետք է ավելի բազամազանություն ու ավելի բազմակողմանի դիսկուրս: Կա հատվածական ընդդիմություն, որը շատ թույլ է` առաջարկներ ներկայացնելու առումով»,- նշեց Կիրակոսյանը:

Ինչ վերաբերում է սահմանադրական բարեփոխումներին, ապա, նրա խոսքով, դրանց արդյունավետությունը կախված է նրանից, թե ինչպես դրանք կանդրադառնան քաղաքական կյանքի վրա: «Հայաստանի քաղաքական համակարգի ճկունության բացակայությունը այլևս չի կարող շարունակվել՝ հաշվի առնելով տնտեսական վատ վիճակը: Սա մի տարածք է, որտեղ կա քաղաքացիական հասարակություն, որը գործում է որոշակի սահմաններում, բայց եթե այդ հասարակությունը դառնա ցանցակենտրոն, այս խնդիրը կարող է լուծվել: Մեզ համար, ապագայի տեսանկյունից, պիտի կարևոր լինի, թե ինչ է կատարվում նաև, օրինակ, Մոլդովայում ու Ադրբեջանում»,- ասաց քաղաքագետը: