Կառավարությունը խոստանում է հանրային սննդի կազմակերպման ու մատուցման առավել քաղաքակիրթ և որակյալ մակարդակ

Կառավարությունն իր ծրագրով խոստանում է առևտրի, ծառայությունների և առևտրային հարաբերությունների կարգավորման և կանոնակարգման պարզեցում՝ էականորեն կրճատելով ոլորտի զարգացման վարչարարական խոչընդոտները: Առևտրի և ծառայությունների ոլորտի զարգացման քաղաքականությունը, նշված է կառավարության ծրագրում, նպատակադրելու է առևտրի առավել մատչելի ու որակյալ և հանրության բոլոր շերտերի համար հասանելի ծառայությունների դաշտի  ընդլայնում:

Ավելի կոնկրետ' կառավարության ծրագիրը նախատեսում է աջակցություն առևտրի նոր տեսակների, հատկապես` էլեկտրոնային առևտրի զարգացման համար պարզեցված և հասանելի համակարգի ընդլայնմանը: Թե ինչպես, չի նշվում, համենայն դեպս, դատելով առաջարկներից, ըստ որոնց` էլեկտրոնային առևտրի համակարգերով գնված ու ներմուծված ապրանքների համար մաքսազերծվելու ենթակա արժեքային շեմը պետք է իջեցվի, այս նպատակադրումը դառնում է անմեկնաբանելի:

Ինչևիցե, առևտրի իրականացման վայրերի և առևտրի օբյեկտների տարածքային օպտիմալ տեղաբաշխման նոր և համակարգված մոտեցումների ձևավորում էլ է նշում կառավարությունը՝ հավելելով, որ դա կարվի' համադրելով այն տարածքային ու համայնքային զարգացման պահանջների, փոքր ու միջին ձեռնարկությունների պահպանման ու ընդլայնման հրամայականի հետ:

Կառավարությունը պատրաստվում է խթանել ու խրախուսել նաև առևտրի, ծառայությունների և հանրային սննդի կազմակերպման ու մատուցման առավել քաղաքակիրթ և որակյալ մակարդակը: Թե ինչ է դա իրենից ենթադրում, մնում է միայն գուշակել' սեփական երեւակայության ու պատկերացումների համապատասխան, քանի որ ավելի կոնկրետ բան կառավարության ծրագիրը չի մատնանշում: