Բռնցքամարտի ֆեդերացիան որոշում ընդունեց մասնակցել Բաքվի Եվրոպական խաղերին

Այսօր տեղի ունեցավ Հայաստանի  բռնցքամարտի ֆեդերացիայի հերթական համաժողովը, որի սկզբում ընտրվեց ֆեդերացիայի նոր  փոխնախագահ և որոշում կայացվեց մասնակցել Բաքվի Եվրոպական խաղերին:

Համաժողովի ընթացքում  Հայաստանի բռնցքամարտի մարզադպրոցների ղեկավարները հաշվետվություն ներկայացրեցին, որից հետո Հայաստանի բռնցքամարտի ֆեդերացիայի նախագահ Արթուր Գևորգյանը հանդիպեց լրագրողների հետ:

«Եթե չլինի քաղաքական որոշում,  ապա մասնակցելու ենք: Մենք ուժեղագույն կազմով ենք ներկայանալու: Բռնցքամարտիկը վախկոտ չի լինում: Այն մարզիկը, ով դուրս է գալիս ռինգ,  նա արդեն տղամարդ է: Իմ կապը մարզիկների և մարզիչների հետ շատ ջերմ է, և ինձ հետ կապ հաստատելը դժվար չէ: Մինչև այսօր ոչ մի մարզիկի ծնող ինձ չի դիմել այդ հարցով: Եթե Բաքվի խաղերին հրաժարվի մասնակցել հավաքականի առաջին մարզիկը, ապա նրա փոխարեն կգնա 2-րդը, և հաղթելու դեպքում հենց նա հնարավորություն կունենա հետագա մրցումներում պայքարել օլիմպիական վարկանիշի համար»,- ասաց Արթուր Գևորգյանը: