Թուրք-սիրիական սահմանի մոտ քրդական երկու գյուղ ազատագրվել է

Սիրիական բանակը մարտի 11-ին ազատագրել է 2 գյուղ, որոնք գտնվում են երկրի հյուսիս-արևելքում՝ Ռաս ալ Այն քաղաքի մերձակայքում. տեղեկացնում է armenpress-ը՝ վկայակոչելով արաբական լրատվամիջոցներ:

Արաբական լրատվամիջոցները հայտնում են, որ ազատագրվել են Տուլան և Ալ Ամիր գյուղերը: Թուրք-սիրիական սահմանի մոտ գտնվող Ռաս ալ Այն քաղաքում թեժ մարտեր են ընթանում ԻՊ ծայրահեղական կազմակերպության անդամների և քրդական ուժերի միջև: Երկու կողմերը տասնյակ կորուստներ են արձանագրել:

Քրդական աղբյուրների տեղեկացմամբ` մարտի 11-ին ահաբեկիչները լայնածավալ գործողություններ են սկսել Ռաս ալ Այն քաղաքի ուղղությամբ՝ օգտագործելով տանկեր, ծանր հրետանի:

Ռաս ալ Այն քաղաքը համարվում է քրդական մեծությամբ երրորդ քաղաքը Հասաքեից և Ղամիշլիից հետո, որը ահաբեկիչների համար Թուրքիայի տարածք մտնելու անցում է: