Անահիտ Բախշյանին դատի կտան զրպարտության, հետապնդման, բարի համբավն արատավորելու, վիրավորանքի համար

Տեղեկացրել էինք, որ Երևանի ավագանու «Բարև Երևան» խմբակցության անդամ Անահիտ Բախշյանը Մոնթե Մելքոնյանի անվան թիվ 11 դպրոցում մի շարք խախտումներ էր հայտնաբերել: Ի պատասխան, թիվ 11 դպրոցի տնօրեն Ռուզաննա Ազիզյանը հերքել էր ամենը` նշելով, որ առաջիկայում պատրաստվում է դատի տալ տիկին Բախշյանին: Ի դեպ, Բախշյանը հայտարարել էր, որ դատարանում պատրաստ է ասել ավելին: 

Yerkir.am-ը փորձեց տեղեկանալ, թե դպրոցի տնօրենն արդեն դիմե՞լ է դատարան: Տիկին Ազիզյանը պատասխանեց, թե քանի որ Բախշյանի` քաղաքապետին ուղղված դիմումն ընթացքի մեջ է, գործընթացն ավարտին չի հասել, չի ուզում պատասխանել հարցին: «Երբ ավարտին կհասնի հարցի հետ կապված քաղաքապետին ուղղված դիմումի ուսումնասիրությունը, իմ վերջնական որոշումը կհայտնեմ»,-ասաց տնօրենը:

Հարցին, թե արդյո՞ք ուզում էր դատի տալ Բախշյանին զրպարտության համար, Ազիզյանը պատասխանեց, որ ոչ միայն զրպարտության. «Հետապնդման, բարի համբավն արատավորելու, վիրավորանքի համար: Այս պատմությունն ամբողջ դպրոցին է վերաբերում, և իրոք, այս ամենը վիրավորական է»: