Ասում են՝ խանդոտ չեն

ԱԺ ՀԱԿ խմբակցության ղեկավար Լևոն Զուրաբյանը, պատասխանելով Yerkir.am-ի այն հարցին, թե  ՀԱԿ-ը խանդո՞վ է մոտենում քաղաքական դաշտում գործող մյուս ընդդիմադիր ուժերին, պատասխանեց. «Ինչո՞ւ, դուք  իմ դեմքի վրա նման բան նկատեցի՞ք»:

Նշեցինք, որ խոսքը հրապարակային ելույթների մասին է, Լևոն Զուրաբյանն ասաց. «Դուք լավ հոգեբան չեք»: Մասնավորեցրինք, որ խոսքը մարտի 1-ին  Լևոն Տեր-Պետրոսյանի ելույթի մասին է: «Դե լավ, լավ, նոր դուք խոսում էիք խանդի մասին, հետք անցաք լրիվ ուրիշ հարցի»,- արձագանքեց պատգամավորը:

«Այդ դեպքում ինչո՞ւ է ՀԱԿ-ը կարծում, որ ընդդիմադիր դաշտում մենակ է մնացել» հարցին Լևոն Զուրաբյանը պատասխանեց. «Այս պահի դրությամբ մենք ենք այն ուժը, որը մերժում է Սերժ Սարգսյանի իշխանությունը, եթե կան այլ ուժեր, ուրեմն ասեք»:

Իսկ ի՞նչ կասի նախկին ՀԱԿ-ական, «Հանրապետություն» կուսակցության ղեկավար Արամ Սարգսյանի այն մեկնաբանության մասին, որ ՀԱԿ-ԲՀԿ դաշինքը կազմվել է Ռուսաստանում և ռուսական սցենարով, Լևոն Զուրաբյանը պատասխանեց. «Ես ամեն անհեթեթություն հո չե՞մ մեկնաբանելու»: