«ՍԱՍ»-ից գողություն կատարած անձի մոտ եղել է 12. 000 դրամ. Աշոտ Ահարոնյան

Համացանցում մեծ արձագանք են ստացել «ՍԱՍ» սուպերմարկետից գողություն կատարած քաղաքացուն ՃՈ աշխատակիցների կողմից բերման ենթարկելու կադրերը: Օգտատերերի մեծ մասը քննադատում են ոստիկանությանը` թե ինչու են փոքր հանցագործության համար քաղաքացուն այդ եղանակով տանում բաժին և եղածը տեսագրում: Այս ամենին, իր հերթին, արձագանքել է ՀՀ ոստիկանության հասարակայնության հետ կապերի և լրատվության վարչության պետ Աշոտ Ահարանյանն, ով իր ֆեյսբուքյան էջում գրել է.

«Տեսանյութ է շրջանառվում, թե Ճանապարհային ոստիկանության ծառայողն ինչպես է բռնում խանութից գողություն արած անձին ու բերման ենթարկում: Իհարկե, սա այն դեպքը չէ, որին անդրադառնալու անհրաժեշտություն կա. գրեթե ամեն օր նման դեպքեր պատահում են, որոնց չենք անդրադառնում: Բայց լրատվամիջոցի կողմից տեսանկարահանվածը ուղեկցվում է օգտատերերի մեկնաբանություններով, որոնց մի մասը, մեղմ ասած, տարօրինակ է: Այլ կերպ չես բնութագրի «հայտնագործությունները», թե ոստիկանը պիտի մտածի՝ այս կասկածյալին բռնի, մյուսին՝ ոչ, այս հանցագործությունը կանխի, իսկ մեկ այլ հանցանք կարելի է և աչքաթող անել:

Ոստիկանի խնդիրը դատողություններ անելը չէ: Ոստիկանի խնդիրը հանցագործությունը կանխարգելելն է, կանխելը, կասեցնելը, բացահայտելը: Տվյալ դեպքում ոստիկանը կատարել է իր գործառույթից բխող գործողություններ ու հստակ է կատարել. Տեսնելով, որ խանութի աշխատակիցը բղավելով հետապնդում է ինչ-որ մեկին՝ բռնել է վերջինիս ու բերման ենթարկել: Չանե՞ր, ձևացներ, թե ոչինչ չի պատահել ու գնար իր ճանապարհո՞վ: Ճանապարհային ոստիկանն այդ պահին ինչպես կռահեր հետապնդվողը քաղցրավենիք էր վերցրել, թե մարմնական վնասվածք հասցրել ինչ որ մեկին:

Այդ դեպքում ի՞նչ տարբերություն իր գործառույթը, կրկնում ենք, հստակ կատարած ոստիկանի ու հետին թվով նրանից այդպիսի պահվածք պահանջողի միջև: Իսկ ինչ վերաբերում է գողացվածի ծավալին ու տեսակին, դա ոչ թե հանցագործությունը կասեցնող ոստիկանի, այլ քննության մարմնի խնդիրն է:

Հ.Գ. Ի գիտություն բոլոր նրանց, ովքեր բերման ենթարկվածի գործողություններում սոցիալական պատճառներ են փնտրում. հիշյալ անձը նախկինում երկու անգամ գույքի հափշտակության համար խնդիրներ է ունեցել եւ եվս մեկ քննական գաղտնիք՚՝ հիշյալ անձի մոտ այդ պահին եղել է 12. 000 դրամ գումար»: