Թուրքիայի Մեջլիսը քննարկել է ԱԳՆ օրացույցում Ծիծեռնակաբերդի լուսանկարի հայտնվելու փաստը

Թուրքիայի ընդդիմադիր Ժողովրդա-հանրապետական կուսակցության` Ստամբուլից պատգամավոր Օսման Քորութուրքը Մեջլիսի օրակարգ է բերել Չանաքքալեի 100-ամյակի կապակցությամբ ԱԳ նախարարության տպագրած օրացույցում Ծիծեռնակաբերդի լուսանկարի հայտնվելու հարցը. տեղեկացնում է Haberler-ը:

Ընդգծելով, որ Հայաստանի Հանրապետությունն ու Հայկական սփյուռքն «ապրիլի 24-ի իրադարձությունների» 100-րդ տարելիցի կապակցությամբ միահամուռ ուժերով արշավ են սկսել ընդդեմ Թուրքիայի, նա հարց է ուղղել ԱԳ նախարար Մևլութ Չավուշօղլուին. «Օրացույցում այդ լուսանկարի հայտնվելն այդ արշավի հետ կա՞պ ունի:

Հիշեցնելով  Թուրքիայի կառավարության՝ հայերի արշավի դեմ հատուկ աշխատանքներ սկսելու մասին հայտարարությունը, Քորթուրքը եւս մի քանի հարց է ուղղել Չավուշօղլուին: Այսպես`

1.      ԱԳ նախարարության օրացույցի ապրիլ ամսվա հատվածում այդ լուսանկարի հայտնվելն այդ աշխատանքների հետ կա՞պ ունի:

2.      ԱԳ նախարարության օրացույցում այս լուսանկարի հայտվելը Հայկական պնդումների 100-ամյակի կապակցությամբ «դրանք լռելյայն ընդունելով մեղմելու» նպատակով արված նոր ռազմավարությո՞ւն է:

3.      Ձեր նախարարությունը չմտածե՞ց, կամ հարգելի նախագահը չզգուշացվե՞ց, որ 1915 թվականի իրադարձությունների կապակցությամբ Հայաստանի և Հայկական սփյուռքի արշավին «իբր» դիմակայելու նպատակով կազմակերպված` Չանաքքալեի 100-ամյակի միջոցառումներին այլ երկրների նախագահներին հրավիրելը միջազգային հանրության կողմից ընկալվեց  որպես մեր պետության կողմից արված «անհաջող մանևր», նախագահներին  հայկական պնդումների և մեր պետության միջև ընտրություն անելու դրության մեջ գցեց, այն դեպքում, երբ նրանք գուցե նման մտադրություն անգամ չունեին:

4.      Հայաստանի և Հայկական սփյուռքի արշավի դեմ, դուք՝ որպես նախարարություն, ի՞նչ աշխատանքներ եք իրականացնում: Դրանց թվում օրացույցում հայտված լուսանկարի նման անակնկալ «զարգացումներ» կա՞ն: