Նոր համալրումներ՝ «Արարատ»-ում

«Արարատ»-ն ավարտեց այս տարվա առաջին արտասահմանյան ուսումնամարզական հավաքը Սոչիում և վերադարձավ Երևան:

Ինչպես հայտնում է երևանյան ակումբի պաշտոնական կայքը,  թիմի կազմը համալրել են դարպասապահ Կարեն Իսրայելյանը, պաշտպաններ Ալեքսանդր Վոլչկովը, Նագի Բուրասը, Րաֆֆի Կայան, Սեյեդ Հոսեյն Հոսեյնին, կիսապաշտպաններ Ամիրի Շոեիբը, Սաման Աղազամանին և Վիկտոր Գարզան, որոնց հետ արդեն պայմանագրեր են ստորագրվել:

 Ավելի վաղ «Արարատ»-ի խաղացողներ էին դարձել դարպասապահ Արամ Հայրապետյանը, պաշտպաններ Վահե Մարտիրոսյանը և Գորիկ Խաչատրյանը, ինչպես նաև` կիսապապաշտպան Կարլո Չուեկան: Սպասվում է, որ մոտ օրերս պայմանագիր կստորագրվի նաև կիսապաշտպան Նիկոլաս Պրոեսմանի հետ:

Ակումբը հրաժարվել է թիմում փորձաշրջան անցած կիսապաշտպան Եվգենի Մորոզից, երկկողմանի համաձայնությամբ խզվել է պայմանագիրը պաշտպան Ջամել Ուոլեսի հետ: Միևնույն ժամանակ, մոտ օրերս թիմին կմիանա 18-ամյա կամերունցի հարձակվող Ումարու Կաինան, ով հանդիսանում է հայտնի Aspire Academy-ի սան:

Սպասվում է, որ «Արարատի» երկրորդ արտագնա ուսումնամարզական հավաքը նույնպես կանցկացվի Սոչիում` փետրվարի 8-ից 20-ը: Նախատեսված են երեք ընկերական հանդիպումներ, իսկ հավանական մրցակիցների թվում են «Սոչին», «Խիմիկը», «Ենիսեյը» և Տուլայի «Արսենալի» երկրորդ թիմը: