Չի կարելի գնալ Ղարաբաղ ու ղարաբաղցիներին հայրենասիրություն սովորեցնել

Այսօր ԱԺ նիստում ՀՀԿ-ական պատգամավոր Սամվել Ֆարմանյանը, անդրադառնալով Բերձորում Հիմնադիր խորհրդարանի ավտոերթի մասնակիցների եւ ոստիկանների միջեւ տեղի ունեցած միջադեպին, նշեց, որ միջադեպն, իհարկե, դատապարտելի է: «Ե'վ հայաստանյան, և' ղարաբաղյան իրավապահ մարմինները պետք է քայլեր ձեռնարկեն ու իրադարձությունը ներկայացնեն հանրությանը»,- ասաց պատգամավորը:

Միաժամանակ, նա նշեց, որ անընդունելի է ապրիլի 24-ը բացասական ենթատեքստով ներկայացնելը: «Ինչպե՞ս կարելի է ապրիլի 24-ը, որ ենթադրաբար ողջ հայության միասնության խորհուրդն ունի, թեկուզ և Ցեղասպանության զոհերի հիշատակման բացասական կոնտեքստում, դարձնել ժողովրդի պառակտման առարկա: Ռեժիմի դեմ պայքարել ցանկացողները կարող են դա անել և պետք է անեն ՀՀ տարածքում: ԼՂՀ-ն ի՞նչ կապ ունի 100-րդ տարելիցն առանց ռեժմի դիմավորելու հետ: Անբարոյականություն է, և դրա մասին պետք է բոլորը բարձրաձայն խոսեն: Չի կարելի գնալ Ղարաբաղ ու ղարաբաղցիներին հայրենասիրություն սովորեցնել: Որ հայությունն անպարտ է, ղարաբաղցիներն են մեզ սովորեցրել, որ հայությունն անպարտ է, նաև` մեր մասնակցությամբ: Սա անընդունելի երևույթ է, դա նշանակում է չճանաչել սրբության ամենավերջին սահմանները»,- ասաց պատգամավորը: