ԲՀԿ-ականները` ընդդեմ ֆինանսների նախարարի

Այսօր, կառավարության նիստին զուգահեռ, ՓՄՁ ներկայացուցիչները շարունակեցին նախորդ օրերին սկսած իրենց բողոքի ցույցը` ուղղված կառավարության կողմից լրացված «Շրջանառության հարկի» դեմ, որը ուժի մեջ կմտնի երկու օրից:

Նախորդ բոլոր օրերին և այսօր ցույցը վարող երիտասարդ ԲՀԿ-ական Արտակ Գրիգորյանը հայտարարեց, որ եթե ՓՄՁ-ների պահանջը չկատարվի, ապա  ՓՄՁ մոտ 7000 ներկայացուցիչ հրապարակավ` կառավարության շենքի առջև, կվերադարձնի իր լիցենզիան և կհրաժարվի աշխատել:

ԲՀԿ-ական երիտասարդը հիմնականում բողոքում էր ՀՀ ֆինանսների նախարար Գագիկ Խաչատրյանից` պահանջելով նրա հրաժարականը:  «Թող ապացուցեն, որ «Մեգաֆուդ»-ն աշխատում ա թղթով ու չի պատկանում Գագիկ Խաչատրյանին: Միայն նրա կողմից են իրականացվում հարկային կուրացիաները, և ծիծաղելի է, որ այդ մարդիկ հայտարարում են, թե ցանկանում են խոշոր բիզնեսը բերել հարկային դաշտ: Չեմ վախենում ասել, որ «Մեգաֆուդը» չի տրամադրել փաստաթուղթ: Այս օրենքը միտված է փոշիացնել փոքր և միջին ձեռնարկատիրության դաշտը ու մոնոպոլիզացնել դաշտը: Իսկ Ալավերդյան Արմենին մի' ֆետիշացրեք, իրա ասածները բանի տեղ մի' դրեք, նա իրեն վաղուց սպառել է»,- ասաց նա:

Ցույցին միացան ԱԺ ԲՀԿ խմբակցության պատգամավորներ Միքայել Մելքումյանը, Վահան Բաբայանը և Վահե Էնֆիաջյանը:

Միքայել Մելքումյանը հայտարարեց, որ երկուշաբթի օրը, երբ սկսվի հերթական քառօրյան, ինքը վարման կարգով ելույթ է ունենալու և առաջարկելու է արտակարգ ու անհետաձգելի խորհրդակցություն անցկացնել ԱԺ նախագահի մոտ` հրավիրելով ՀՀ ֆինանսների նախարարին: