Դավիթ Սարգսյանին չեմ ճանաչել. ամբաստանյալը հերքում է իր կապը ֆինանսների նախկին նախարարի հետ

«Հայրս ամենաթանկ անձնավորություններից է եղել ինձ համար: Եվ նրան ինձնից խլողները անպատիժ չեն մնալու: Պատասխանատվություն են կրելու օրենքի առաջ»,- իր ցուցմունքում ասաց 35-ամյա ամբաստանյալ Արթուր Սարգսյանը:

Նա մեղադրվում է հաջողակ բիզնեսմեն և կառավարության իրավաբանական վարչության պետ ներկայանալու և այդպիսով առանձնապես խոշոր չափերի գույքի հափշտակման մեջ: Կենտրոն և Նորք-Մարաշ վարչական շրջանների ընդհանուր իրավասության դատարանում տեղի ունեցած այսօրվա դատական նիստում սկսվեց ամբաստանյալի հարցաքննությունը:

Նա նախ հայտնեց, որ իրեն առաջադրված որևէ դրվագով իրեն մեղավոր չի ճանաչում: Այնուհետև դատարանին և մեղադրող դատախազին փոխանցեց իր ցուցմունքի գրավոր տարբերակը` երկու հաստ թղթապանակներով:

Ամբաստանյալը հայտնեց, որ, 2008 թվականից սկսած, բիզնեսում ունեցած իր անհաջողությունների և իր ընտանիքի քայքայման հետևում կանգնած է մի պաշտոնատար անձ, որի անունը տալ չի ցանկանում: Սակայն ցուցմունքում ներկայացրեց որոշ մանրամասներ այդ անձի կողմից իր դեմ գործելու վերաբերյալ:

Ցուցմունքում ամբաստանյալն անդրադարձավ նաև իր և ֆինանսների նախկին նախարար Դավիթ Սարգսյանի ենթադրյալ կապին. «Կառավարության շենքում ես եղել եմ երկու անգամ, այն էլ` բնակարանի բանալին կնոջիցս վերցնելու նպատակով: Նույնիսկ կնոջս (Գայանե Մաթևոսյանը եղել է Դավիթ Սարգսյանի գործավարը –Ա.Կ.) աշխատասենյակ չեմ մտել, նա իջել է ընդունարան… Իսկ Դավիթ Սարգսյանի շուրջ ծավալած այդ սցենարը շատ պրիմիտիվ է, և շուտ կհոգնեցնի հանդիսատեսին: Ես չեմ ճանաչում Դավիթ Սարգսյանին: Առաջին անգամ նրան տեսել եմ դատարանում, երբ նա դատակոչվել է»:

Շարունակությունն ու տեսանյութն` առաջիկայում: