Սպանված Ավետիսյանների իրավահաջորդները դեռևս փաստաբան չունեն

Գյումրիում Ավետիսյանների ընտանիքի 7 անդամներին դաժանաբար սպանելու քրեական գործում ներգրավվել է տուժողների 5 իրավահաջորդ: Նրանք, սակայն դեռևս փաստաբաններ չունեն: Այս մասին Yerkir.am-ին հայտնեց ՀՀ քննչական կոմիտեի նախագահի խորհրդական Սոնա Տռուզյանը:

Նա նշեց նաև, որ իրավահաջորդների ինքնությունը դեռևս բացահայտել չեն կարող` նրանց իսկ խնդրանքով:

Օրեր առաջ փաստաբան Հայկ Հարությունյանը հայտարարել էր, որ Շիրակի մարզում գործունեություն ծավալող 30 փաստաբաններ պատրաստ են անվճար իրավաբանական ծառայություններ մատուցել տուժողների իրավահաջորդներին:

Yerkir.am-ի հետ զրույցում Հայկ Հարությունյանն ասաց, որ նախաձեռնությանը միացել են նաև փաստաբաններ Երևանից ու Լոռու մարզից: Հայտնի փաստաբաններից արձագանքնել են` Փաստաբանների պալատի նախագահ Արա Զոհրաբյանը, Տիգրան Աթանեսյանը, Ռուբեն Բալոյանը և այլք:

Հայկ Հարությունյանը հայտնեց, որ տուժողների իրավահաջորդները կապվել են իր հետ, խնդրել, որ իրենց տան նախաձեռնությանը մասնակցող փաստաբանների ցուցակը, որ իրենք ընտրեն 1-2 փաստաբանի: Սակայն դեռևս որևէ փաստաբան չի ներգրավվել գործում, ասել են, թե, քննչական գործողությունների հետ կապված, սպասում են ինչ-որ պատասխանի: