Տղամարդավարի ձեզ ասում եմ՝ 100 տոկոսով դիմելու եմ ՌԴ գլխավոր դատախազություն. Կոստանյան

Շիրակի թեմի առաջնորդ Միքայել եպիսկոպոս Աջապահյանը Գյումրու դատախազության շենքի առջեւ հավաքված հազարավոր ցուցարարներին առաջարկեց դիմել երկնավոր Հորը, որ նա իմաստնություն տա ժողովրդին այդ դժվարին գործում: Հազարավոր ցուցարարները միաձայն «Հայր մեր»-ն աղոթեցին:

Եպիսկոպոսը հայտարարեց, որ գլխավոր դատախազը կատարելու է ամեն հնարավորը, որ կատարվի այն, ինչ բոլորը պահանջում են, պարզապես  պետք է որոշակի ժամանակահատված` քննչական աշխատանքն իրականացնելու համար: Բայց ցուցարարները վանկարկեցին. «Հիմա, հիմա: Ինչո՞վ երաշխավորված լինենք, որ ոճրագործը դատվելու է Հայաստանի օրենքներով»:

Գևորգ Կոստանյանը հայտարարեց. «Ես հիմա, որպես գլխավոր դատախազ, տղամարդավարի ձեզ ասում եմ` ես 100 տոկոսով դիմելու եմ այս պահանջով Ռուսաստանի գլխավոր դատախազությանը»: Ցուցարարները կրկին վանկարկեցին. «Հիմա, հիմա: Հիմա ինչո՞ւ չեք դիմում, ի՞նչն է խանգարում, գալի՞ս եք մեզ հետ` գնանք` բողոքելու Ռուսաստանից»:

Գևորգ Կոստանյանը պատասխանեց. «Մենք քննարկեցինք առաջին քայլը: Տեսնենք` որն է լինում արդյունքը, հետո կքննարկենք մյուս քայլերը: Ես չեմ կարող ենթադրել»: Ցուցարարներից մեկը բորբոքված դիմեց նրանն. «Դուք մեզ մի' խաբեք, սա Գյումրին է, հերիք եղավ, Կոստանյա'ն, ի՞նչ գործ ուներ էդ սրիկան մեր քաղաքում»: