Եթե էլեկտրաէներգիան 10 տոկոսով է թանկացել, ապա պետական ծառայողների աշխատավարձը 100 տոկոսով բարձրացել է. Արման Սահակյան

ՀՀ ԱԺ նախագահի որդու, ՀՀ ԿԱ պետական գույքի կառավարման վարչության պետ Արամ Սահակյանի համար շփոթեցնող էր Yerkir.am-ի հարցը, թե կկարողանա՞ ձմռանը վճարել թանկացած էլեկտրաէներգիայի դիմաց: «Ի՞նչ է նշանակում` կկարողանաք»,- հարցրեց նա, ապա պատասխանեց, որ կփորձի խնայողաբար օգտագործել էլեկտրաէներգիան:

Ինչ վերաբերում է այն հարցին` ի՞նչ է մտածում էլեկտրաէներգիայի թանկացման արդյունքում էլ ավելի սրված սոցիալական դժգոհության մասին, պատասխանեց. «Դե ես չեմ կարծում, որ հասարակության ըմբոստությունը պայմանավորված է մեկ-երկու տասնյակ մարդկանցով»:

Հարցին` արդյո՞ք կկարողանան ՀՀ քաղաքացիները վճարել սպառած էլեկտրաէներգիայի ու գազի դիմաց, Արման Սահակյանը պատասխանեց. «Առավել ևս` հուլիսի 1-ից պետական ծառայողների և քաղծառայողների աշխատավարձերն է բարձրացել, համենայն դեպս, դրան զուգահեռ է եղել թանկացումը: Կոնկրետ չգիտեմ, թե ինչքան է թանկացել, բայց չեմ կարծում, որ էդ թանկացումը մեծ ազդեցություն ա ունենալու»:

Նշեցինք, որ թանկացել է 10 տոկոսով, և Արման Սահակյանը շարունակեց. «Եթե 10 տոկոսով թանկացել է, ապա պետական ծառայողների ու քաղծառայողների աշխատավարձերն էլ մոտ 100 տոկոսով են բարձրացել»: