Կոստանյանը հանդիպեց գյումրեցիների հետ

Քիչ առաջ ՀՀ գլխավոր դատախազ Գևորգ Կոստանյանը դուրս եկավ  ՀՀ Շիրակի մարզի դատախազության շենքի առջև հավաքված գյումրեցիների մոտ:

«Ասպարեզ» մամուլի ակումբի ղեկավար Լևոն Բարսեղյանը բարձրախոսով դարձյալ ներկայացրեց իրենց պահանջը, այն է` մեղադրյալ Պերմյակովին հանձնել հայկական իշխանություններին, այնուհետև բարձրախոսը փոխանցեց գլխավոր դատախազին:

«Ես արդեն երկրորդ անգամ եմ իջնում: Հուսամ` այս անգամ իրար կհարգենք ու կլսենք: Ես պատրաստ եմ հարյուր անգամ էլ իջնել ու ամեն մեկիդ հետ տղամարդը տղամարդու պես զրուցել»,- ասաց Գ. Կոստանյանը:

Նա ասաց, որ ինքը համաձայն է հավաքվածների հետ, որ ունեն նույն նպատակը, և հենց այդ նպատակին հասնելու համար էլ արվում են բոլոր քայլերը: «Փաստ է, որ կատարվել է ոճրագործություն, փաստ է, որ գործի քննությունը ամբողջությամբ կատարվելու է Հայաստանի տարածքում: Մեր քննիչները հիմա զորամասում են, հարցաքննում են նրան, համբերեք»,- հորդորեց դատախազը:

Հավաքվածները, սակայն, խլացնում էին Կոստանյանի ձայնը: Վայրկյաններ անց նա շարունակեց. «Ես ձեզ հասկանում եմ: Եթե ինչ-որ մեկը մեր պետության դեմ է դուրս եկել, ուրեմն իմ դեմ է դուրս եկել, ես էլ ընտանիք, էրեխեք ունեմ: Տպավորություն է` մենք մի բան ենք ուզում, դուք` այլ բան, բայց այդպես չէ»:

Կոստանյանին հավաքվածները դարձյալ լռեցրեցին: Դատախազին մոտեցավ ԱԺ պատգամավոր Զարուհի Փոստանջյանը: Ներկայումս նրանք քննարկում են հարցի իրավական կողմը: