Ազատ ոճի ըմբշամարտի Մ23 տարեկանների Հայաստանի առաջնությունը` հունվարի 20-22-ը

Հունվարի 20-22 Երևանի խուլ ու համրերի մարզապալատում տեղի կունենա ազատ ոճի ըմբշամարտի` մինչև 23 տարեկանների Հայաստանի առաջնությունը, որի հիման վրա էլ կձևավորվի այդ տարիքային հավաքականը: Այս մասին Հայաստանի ըմբշամարտի ֆեդերացիայի պաշտոնական կայքին հայտնել է ազատ ոճի ըմբշամարտի Հայաստանի հավաքականի գլխավոր մարզիչ Արայիկ Բաղդադյանը:

«Այս տարի առաջին անգամ մասնակցելու ենք մարտի վերջին Լեհաստանում կայանալիք` մինչև 23 տարեկանների եվրոպական ստուգատեսին, ուստի Հայաստանի առաջնությունում առաջին, երկրորդ տեղերը գրաված մարզիկները կմիանան մեծահասակների հավաքականին և հունվարի վերջից այս տարվա առաջին երկշաբաթյա հավաքը կանցկացնենք Ծաղկաձորում»,- ասել է Արայիկ Բաղդադյանը:

Հավաքականի գլխավոր մարզիչը նաև նշել է, որ մեծահասակների Հայաստանի առաջնությունը կայանալու է ապրիլին, հավանաբար` Վանաձորում:

Նշենք, որ հունահռոմեական ոճի ըմբշամարտի Հայաստանի հավաքականի գլխավոր մարզիչ Լևոն Ջուլֆալակյանը որոշել է մինչև 23 տարեկանների Եվրոպայի անդրանիկ առաջնությանը մասնակցել հունվարի 28-30-ը Վանաձորում կայանալիք` մեծահասակների Հայաստանի առաջնությունից ընտրված մարզիկներով: