Ավտոգազը կրկին թանկացել է, այժմ վաճառվում է 280 դրամով

Գազալցակայաններում գազը շարունակում է թանկանալ: Արդեն նշել էինք, որ նախորդ շաբաթվա ընթացքում գազալցակայաններում գազը թանկացել էր մինչև 30 տոկոսով` 170 դրամի փոխարեն դառնալով 230 դրամ: Հիմնական պատճառը, իհարկե, դոլարի թանկացումն էր, քանի որ խոշոր գազ սպառողները`տնտեսվարողները, գազը «Գազպրոմ Արմենիա»-ից գնում են դոլարով, իսկ դոլարը մինչև նախորդ շաբաթվա ավարտը թանկացել էր 70 դրամով:

Այսօր, ըստ Yerkir.am-ի տեղեկությունների, որոշ գազալցակայաններում 1 խմ գազը վաճառվում է արդեն 270-280 դրամով, պատճառը, հավանաբար, այն է, որ դոլարն այսօր, նախորդ շաբաթվա համեմատ, թանկացել է 35 դրամով: Գազալցակայաններում այս թանկացումը դեռևս զանգվածային բնույթ չի կրում, բայց չի բացառվում, որ այս շաբաթվա ընթացքում բոլոր գազալցակայաններում գազի գինը կրկին թանկանա մինչև 50 դրամով` պայմանավորված դոլարի կտրուկ թանկացմամբ: