ԿԳՆ-ն ՀՊՃՀ-ի հետ կապված իր ուսումնասիրությունն ավարտել է

Նախարար Արմեն Աշոտյանը դեռ նոյեմբերին, երբ աշխատանքից ազատված` ՀՊՃՀ տեղեկատվական և հեռահաղորդակցական տեխնոլոգիաների վարչության պետ Վլադիմիր Խոեցյանը բաց նամակ էր հղել իրեն, հայտարարել էր, որ իր հանձնարարությամբ, ԿԳՆ-ի լիազորությունների շրջանակում, այն համապատասխան ուսումնասիրության կենթարկվի:

Yerkir.am-ի հետ զրույցում ՀՀ ԿԳՆ իրավաբանական վարչության պետ Վահե Բավեյանը նշեց, որ բուհի պրոռեկտոր Աշոտ Խաչատրյանը, ով ազատվել էր նախ` ֆիզիկայի ամբիոնի վարիչի պաշտոնից, հետո` նաև պրոռեկտորի պաշտոնից, ինչպես նաև Խոեցյանը, ով նույնպես ազատվել էր պաշտոնից, դիմել են դատարան` բուհի ռեկտորի պաշտոնակատար Հովհաննես Թոքմաջյանի հրամաններն անվավեր ճանաչելու պահանջով:

«Խաչատրյանը դատարանին իր հայցադիմումն է ներկայացրել նոյեմբերի 20-ին, Խոեցյանը` նոյեմբերի 27-ին: Դատարանը Խաչատրյանի հայցը վարույթ է ընդունել, Խոեցյանի հայցով դեռ վարույթ չի ընդունվել, բայց այն երկար սպասեցնել չի տա: Ինչ վերաբերում է ԿԳՆ գործողություններին, նախարարությունն իր լիազորությունների շրջանակներում, որպես վերադաս մարմին, սահմանված կարգով բուհի ղեկավարությունից պահանջել է հրամանների բոլոր իրավական հիմքերը, և բուհը դրանք ներկայացրել է` պահպանելով կարգն ու ժամկետները»,- ասաց Բավեյանը:

Նա նշեց նաև, որ նախարարությունում այդ բոլոր փաստաթղթերն ուսումնասիրվել են, ուսումնասիրությունների արդյունքում ԿԳՆ-ն իր եզրակացությունն է արել, որը, ցավոք, դեռ հրապարակել չի կարող:

«Այն պարագայում, երբ նշանակված է դատաքննություն, մենք չենք կարող իրավական գնահատական տալ: Մենք մեր եզրակացությունները կհրապարակենք դատարանի վճռից հետո»,- ասաց Բավեյանը:

Նշենք, որ Աշոտ Խաչատրյանի գործով դատական առաջին նիստը նշանակվել է 2015-ի մարտի 9-ին: