Ոչ մի անշրջելի բան չկա, ոչ մեկը լուսանցքային չէ. Րաֆֆի Հովհաննիսյանը հակադարձում է Լևոն Տեր-Պետրոսյանին

Այսօր Ազատության հրապարակում «Ժառանգություն» կուսակցության ղեկավար Րաֆֆի Հովհաննիսյանը քաղաքացիական ժողով է հրավիրել:

Այն սկսվեց ՀՀ օրհներգի կատարմամբ: Հավաքվել էին մի քանի տասնյակ քաղաքացիներ:

Րաֆֆի Հովհաննիսյանը, նայելով սակավաթիվ մարդկանց, ասաց, որ նման իրավիճակներում ինքը եղել է բազմիցս, բայց ժողովրդի պայքարը չի ճանաչում ո'չ եղանակ, ո'չ ստվերային խաղեր, ո'չ կուսակցական պահեր:

«Մի վեց շաբաթ առաջ այս հրապարակում, որտեղ ավելի շատ ժողովուրդ էր հավաքվել` հայտնի պատճառներով, ես ճղեցի ելույթս: Հիմա ուզում եմ մի քանի պարբերություն կարդալ այդ ելույթից: Այս աշխարհի վրա և մեր երկրում ոչ մի անշրջելի բան չկա, ոչ մեկը լուսանցքային չէ, ամեն մարդ կապ ունի մեր երկրի և մեր ապագայի հետ»,- ասաց նա:

Հովհաննիսյանի ելույթը միավորվելու անհրաժեշտության մասին էր: «Ես շատ դաժան պահեր ու անկման շրջաններ եմ տեսել, երբ միգուցե մենք չէինք հասկանում միմյանց: Հակասությունների ու մեղքի մշուշի պատճառով դժվար էր տեսնել, թե ինչ է սպասվում առջևում, բայց այդ ամենից հետո միավորվեցինք` որպես մեկ մարդ: Մեր երկիրը չի կարող տապալվել ո'չ ներսից, ո'չ էլ արտաքինից»,- ասաց նա: