Ամբաստանյալը կրկին չհարգեց դատարանին և նստած էր պատասխանում հարցերին

Շանթ Հարությունյանի և մյուսների գործով առաջին դատական նիստի օրը դատարանի շենքի մոտ օդամղիչ ատրճանակով կրակոցներ արձակած ամբաստանյալ` 31-ամյա Հայկ Կյուրեղյանի գործով դատական նիստն այսօր նորից հետաձգվեց նրա փաստաբանի` ներկա չլինելու պատճառով:

Հայկ Կյուրեղյանը, ինչպես նախորդ, այնպես էլ այսօրվա դատական նիստում չհարգեց դատարանին և ոտքի չկանգնեց, երբ նիստերի քարտուղարը հայտնեց դատարանի` նիստերի դահլիճ մտնելու մասին:

Դատարանը, դատավոր Արմեն Բեկթաշյանի նախագահությամբ, ամբաստանյալին բացատրեց Քրեական դատավարության օրենսգրքով սահմանված` դատարանին հարգելու և դատարանին դիմելու կարգը, նաև ծանոթացրեց դատավարության նորմերը խախտելու դեպքում սահմանված սանկցիաներին:  Այնուհետև Հայկ Կյուրեղյանին նախազգուշացրեց և նշեց, որ կրկնվելու դեպքում այլ սանկցիա կկիրառվի:

Սակայն, երբ դատարանը բացատրություն պահանջեց ամբաստանյալից փաստաբանի` ներկա չլինելու վերաբերյալ, Հայկ Կյուրեղյանը դարձյալ ոտքի չկանգնեց դատարանին պատասխանելիս: Այս հանգամանքը դատավորն աննկատ չթողեց և ասաց, որ դրան դատարանը դեռ կանդրադառնա: Այնուհետև հայտարարեց նիստը հետաձգելու մասին, քանի որ փաստաբանը ներկա չէր նիստին: Միևնույն ժամանակ, նրանից հրաժարվելու պատշաճ դիմում չէր ներկայացվել դատարանին:

Հիշեցնենք, որ Հայկ Կյուրեղյանին այս գործով մեղադրանք է առաջադրվել Քրեական օրենսգրքի 258-րդ հոդվածի 4-րդ մասի հատկանիշներով` զենքի կամ որպես զենք գործածվող առարկաների գործադրմամբ խուլիգանություն կատարելը: