Կրկնակի աճել են բողոքները, երբ պետական մարմինները չեն պատասխանում լրագրողների հարցերին. ՄԻՊ

Մարդու իրավունքների պաշտպան Արման Թաթոյանն այսօր խորհրդարանում ՄԻՊ 2018թ. զեկույցի քննարկման ժամանակ ընդգծեց` պետական մարմինը լրագրողին օրինավորության կանխավարկածով պետք է վերաբերվի: Հստակեցրեց`կարծրատիպը, թե լրագրողը խոչընդոտում է պետական մարմնի աշխատանքին, պետք փոխել:

«2017-ի համեմատ` երկու անգամ աճել են 2018-ի բողոքները, երբ պետական մարմինները չեն պատասխանում քաղաքացիների և լրագրողների հարցերին»,- հավելեց նա:

ԱԺ «Իմ քայլը» խմբակցության պատգամավորներից Ծովինար Վարդանյանը հետաքրքրվեց` համեմատություն արվե՞լ է, թե քանի հարցման դեպքում պետական գերատեսչությունները քանի հարցի են պատասխանել։ 

Պաշտպանն ասաց, որ հարցումների աննախադեպ աճ է եղել։ Հարցերն այնքան շատ են եղել, որ ոչ միայն իրենք են ծանրաբեռնված աշխատել, այլև ամբողջ պետական ապարատը: «Պետական ապարատը պատրաստ չէր այդ աստիճան մեծ հոսքի»,- ամփոփեց ՄԻՊ-ը: