Հո չէր ասելու` հորս արև, մաքսակետ չի լինելու. Շարմազանով

Երեկ ԱԺ տնտեսական հարցերի հանձնաժողովի նիստում, երբ կառավարության ներկայացուցիչները ներկայացնում էին ԵՏՄ-ին Հայաստանի միանալու պայմանագիրը, ԱԺ պատգամավոր Խաչատուր Քոքոբելյանը նշեց, որ Արցախի ու Հայաստանի միջև մաքսակետ տեղադրելու հարցը բաց է մնում, իսկ իշխանություններն այդ հարցին տալիս են նկարագրական և բարի ցանկություներով համեմված պատասխաններ:

Այսօր լրագրողների հետ զրույցում  ԱԺ փոխխոսնակ Էդուարդ Շարմազանովը նշեց, որ պարտադիր չէ, որ իշխանությունների բոլոր պատասխանները գոհացնեն բոլոր ընդդիմադիրներին:

«Ինձ համար բավական հստակ հայտարարեց արտաքին գործերի նախարարի տեղակալ Շավարշ Քոչարյանը, որ մաքսակետի խնդիր չի քննարկվել` առհասարակ: Դրանից ավելի հստակ պատասխան ի՞նչ պետք է լինի: Հո չէր ասելու` հորս արև, մաքսակետ չի լինելու»,- ասաց նա:

Հարցին, թե ՀՀԿ խմբակցության նիստում հնչե՞լ է մաքսակետի տեղադրման վերաբերյալ հարց, ՀՀԿ խմբակցության ղեկավար Վահրամ Բաղդասարյանը պատասխանեց. «Մաքսակետի խնդիր ընդանրապես չկա, ոնց կա, այդպես էլ պետք է մնա»: