Երեկ վթարից տուժած 14-ամյա տղան կոնքոսկրերի կոտրվածք ունի

Տեղեկացրել ենք, որ երեկ երեկոյան խոշոր ավտովթար է տեղի ունեցել Շիրակի մարզում: Երևան-Գյումրի ավտոճանապարհի` Հոռոմ գյուղի խաչմերուկում մարդատար «ԳԱԶել» մակնիշի ավտոմեքենան բախվել է «ԿամԱԶ» մակնիշի բեռնատարին, ինչի հետևանքով «ԳԱԶել»-ը պայթել է։ Վթարի պահին «ԳԱԶել»-ում եղել է 14 ուղեւոր, որոնցից 7-ը տեղում մահացել են, իսկ 7-ը` տեղափոխվել «Գյումրի» բժշկական կենտրոն։

Yerkir.am-ի հետ զրույցում բժշկական կենտրոնի տնօրեն Արմեն Իսահակյանը հայտնեց, որ վիրավորների թվում կա նաեւ 14 տարեկան երեխա` Էդմոն Սիմոնյանը:

«Տղայի վիճակը կայուն է, չէի ասի` շատ ծանր, բայց խնդիրներ կան: Տղան զույգ կոնքոսկրերի կոտրվածք ունի: Կոտրվածքները, բնականաբար, ցավոտ են»,- ասաց բժիշկը:

Նա տեղեկացրեց նաև, որ Էդմոն Սիմոնյանը վերակենդանացման բաժանմունքում չէ, այլ ընդհանուր պալատում:

«Տղայի մոտ են նրա ծնողները, նա շփվում, խոսում է: Տղան միակն է մեզ մոտ տեղափոխված հիվանդներից, ով վիրահատական միջամտության կարիք ունի: Ծնողների հետ ենք հիմա զրուցում, վիրահատության մանրամասները քննարկում, եթե նրանք համաձայնեն` վիրահատությունը հենց մեզ մոտ կընթանա, եթե ոչ` կարող ենք տղային տեղափոխել մեկ այլ հիվանդանոց»,- ասաց Իսահակյանը` հավելելով, որ տղան  այրվածքներ գրեթե չունի: