Դավթաշենում պայթյունից տուժած 20-ամյա տղան գիտակցության է եկել

Դավթաշեն 2-րդ փողոցի տան բակում տեղի ունեցած պայթյունի հետևանքով տուժած 20-ամյա Աշոտ Եփրեմյանի առողջական վիճակում դրական դինամիկա կա: Այս մասին Yerkir.am-ի հետ զրույցում ասաց «Արմենիա» բժշկական կենտրոնի անոթային վիրաբուժության կենտրոնի վարիչ Վիրաբ Աղաբեկյանը:

Երեկ տղային կրկին վիրահատել էին` անդամահատելով վերջույթներից մեկը:

Աղաբեկյանը նշեց, որ տղան գիտակցության է եկել: «Կարող եմ ասել, որ վիճակը ոչ թե ծայրահեղ ծանր է, այլ ծանր կայուն: Գիտակցությունը տեղն է, խոսում է, բայց դեռ արհեստական շնչառության սարքին է միացված: Այս պահին տղայի կյանքին վտանգ չի սպառնում»,- ասաց նա:

Նշենք, որ տղան վերակենդանացման բաժանմունքում է: