Հասմիկ Ղարիբյանը ցանկանում էր կանանց հումորի ակումբ բացել Հայաստանում

«Հասմիկը ոնց որ կադրում էր` աշխույժ, դրական լիցքեր հաղորդող, նույն կերպ էլ կադրից այս կողմ` կյանքում էր»,- Yerkir.am-ի հետ զրույցում ասաց դերասան Ռաֆայել Երանոսյանը` խոսելով դերասանուհի Հասմիկ Ղարիբանի մասին:

Նա նշեց, որ Հասմիկ Ղարիբյանի հետ սկսել է համագործակցել, երբ «Կարգին հաղորդման» մեջ է նկարահանվել /2007 թվականից/:

«Այդ ժամանակ ծանոթացանք ու դարձանք ընկերներ: Հետո, իհարկե, մեր ծանոթությունն ավելի խորացավ, ու ուղղակի իրար հարազատ մարդիկ էինք դարձել: Հասմիկն իր տեսակով, գեղեցկությամբ ու հմայքով առանձնացող կերպար էր, ժամերով կարող էիր նստել ու զրուցել նրա հետ»,- ասաց Երանոսյանը:

Նա հիշեց նաև, որ վերջին անգամ Հասմիկ Ղարիբյանի հետ նույն բեմին են եղել 2012-ին, երբ հյուրախաղերով /«No comment»/ գնացել էին ԱՄՆ:

«Մենք գնացինք, բեմադրեցինք ու հետ եկանք, իսկ Հասմիկը մնաց: Դրանից հետո արդեն հեռախոսով, «Ֆեյսբուք»-ով էինք շփվում: Այս տարվա օգոստոսին, երբ վերջին անգամ գնացել էինք ԱՄՆ` հյուրախաղերի, զանգահարեցինք Հասմիկին, քույրը վերցրեց, ասաց` Հասմիկը քնած է, կարթնանա կասեմ` կզանգի: Բայց նա այդպես էլ չզանգեց, երևի չէր ուզում, որ մենք իրեն նման վիճակում տեսնենք, քանի որ այդ ժամանակ վիճակն արդեն վատ էր: Երևի բարին էլ դա էր, որ մենք նրան չտեսանք ընկճված: Մենք միշտ կհիշենք այն Հասմիկին, որին տեսել էինք 2012-ին»,- ասաց Երանոսյանը:

Ըստ նրա` դերասանուհին ուզում էր կանանց ակումբ ստեղծել, ասում էր` կհավաքեմ տաղանդավոր աղջիկների, ինչպես «Comedy women»-ն է, և մենք էլ մեր ակումբը կունենանք: «Ինձ էլ հարցնում էր` որ էդ ակումբն ունենանք, կաշխատի՞ այստեղ: Հասմիկը շատ գաղափարներ ուներ, պոռթկումը, մտահղացումները, բեմի, կյանքի հետ կապված, շատ-շատ էին: Ասում էր` կգնամ Ամերիկա ու այնտեղ էլ առաջ կգնամ: Ես էլ ասում էի` ըհը, Ամերիկան էլ նստած քեզ է սպասում, և մենք վիճում էինք հաճախ, բայց լավ իմաստով` իրար հոգու հետ խաղալով»,- պատմեց մեր զրուցակիցը: