Ծառուկյանի եւ Տեր-Պետրոսյանի դիրքորոշումը ՌԴ դեսպանի համար զարմանալի չէ

ՀՀ-ում ՌԴ դեսպան Իվան Վոլինկինը զարմանալի որեւէ բան չի տեսնում, որ ԲՀԿ ղեկավար Գագիկ Ծառուկյանը եւ ՀԱԿ ղեկավար Լեւոն Տեր-Պետրոսյանը ԵՏՄ-ի կողմնակիցներ են: Այս մասին նա ասաց yerkir.am-ի հետ զրույցում:

«Զարմանալի որևէ բան չկա, որովհետև հայ հասարակության մեծ մասն է կողմնակից ՀՀ-ի անդամակցությանը ԵՏՄ-ին եւ այդ ինտեգրացիան ողջունում է»,- ասաց դեսպանը մեր թղթակցի հետ զրույցում:

Հարցին, թե որտեղի՞ց գիտի, որ հայ հասարակության մեծամասնությունը կողմնակից է անդամակցությանը ԵՏՄ-ին, Վոլինկինը պատասխանեց. «Կան սոցիոլոգիական հարցումներ, որոնք վկայում են, որ ոչ թե մեծամասնությունը, այլ բացարձակ մեծամասնությունն է կողմ այդ ինտեգրացիային, կարծում եմ` հասարակության 80 տոկոսն է կողմ»:

Մեր դիտարկմանը, որ ոչ իշխանական երեք ուժերից «Ժառանգության» ղեկավար Րաֆֆի Հովհաննիսյանը դեմ է այդ անդամակցությանը եւ դրա մասին հրապարակավ հայտարարեց վերջին հանրահավաքի ժամանակ էլ, դեսպանն այսպես արձագանքեց. «Ամեն քաղաքական ուժ ունի իր տեսակետը: Ամեն պետության ներսում էլ ցանկացած հարցի վերաբերյալ կարող են լինել կողմ և դեմ տեսակետներ, անսովոր բան չեմ տեսնում»: