Մոսկվան փորձում է սիրաշահել Բաքվին. Коммерсант-ի անդրադարձը

Ռուսական  Коммерсант թերթն անդրադարձել է ՌԴ ՊՆ ղեկավար Սերգեյ Շոյգուի՝ Ադրբեջան կատարած այցին: 

Ադրբեջանցի գործընկերոջ հետ հանդիպման ընթացքում Շոյգուն քննարկել է ռազմական-տեխնիկական համագործակցության հարցեր: Թերթի աղբյուրի համաձայն՝ տվյալ ոլորտը շատ արդյունավետ է: Միայն 2010-2012թթ. պայմանագրեր են ստորագրվել, որոնց ընդհանուր արժեքը կազմել է 4 մլրդ դոլար: Իսկ մինչև ընթացիկ տարեվերջը, ըստ աղբյուրի,  Մոսկվայից Բաքվի գնած զենքի արժեք կկազմի 5 մլրդ դոլար:  Ադրբեջանը ներկայումս հետաքրքրված է ռուսաստանյան Бал-Э ափային հրթիռային համակարգով:

Թերթի աղբյուրը նաև նշում է, որ Շոյգուի այցը Բաքվում որակվել է «լավ վերաբերմունքի նշան», որը պետք է ամրապնդի Աստրախանում երկու երկրների նախագահների կողմից ձեռք բերված պայմանավորվածությունները:  Կրեմլին մոտ կանգնած աղբյուրը նշում է, որ Մոսկվան փորձում է մեղմել Հայաստանի՝ ԵՏՄ-ին անդամակցելու բացասական էֆեկտը հայ-ադրբեջանական հարաբերությունների համար: