Ալարում ե՞ք` գաք, մարդկանց նորմալ բացատրեք. վարչապետը` նախարարին

Այսօր կառավարության նիստում, երբ ՀՀ աշխատանքի և սոցիալական հարցերի նախարար Արտեմ Ասատրյանը ներկայացնում էր հաստատման ենթակա որոշման նախագծեր, մասնավորապես` նպաստների մասին օրենքում լրացումներ կատարելու մասին որոշման նախագիծը, որով առաջարկվում է օրենքի մեջ մտցնել «մայրական նպաստ» հասկացությունը, որը հնարավորություն կտա 30 հազար մայրերի ստանալու այդ նպաստը, ՀՀ վարչապետը խիստ տոնով ուղղեց նախարարին. «Չաշխատող մայրերին: Դե այդպես էլ ասեք, որ մարդիկ հասկանան: Ընդհանրապես, իմ գործընկերներին խնդրում եմ, որ օրենքները նորմալ ներկայացնեն: Մարդիկ լսում են, չեն հասկանում` ինչի մասին է խոսքը: Ալարում ե՞ք` գաք, մարդկանց նորմալ բացատրեք: Եվ ես առաջարկում եմ, որ Դուք էլ իջնեք լրագրողների մոտ արդարադատության նախարարի հետ միասին և բացատրեք օրենքի նախագծերը»:

Նշենք, որ արդարադատության նախարարի մամուլի ասուլիսը չկայացավ Սուրիկ Խաչատրյանի վերաբերյալ լրագրողների համառ հարցերին չպատասխանելու պատճառով: Լրագրողները որոշել էին նույն ձևով տապալել նաև Արտեմ Ասատրյանի ասուլիսը: Նա, ենթադրելով դա, հրաժարվել էր մամուլի ասուլիս տալուց: