Պիտի ասե՞ք, թե՞ չէ, Արմա՛ն, չեմ հասկանում, ալարում ե՞ք խոսել. Հովիկ Աբրահամյան

Այսօր կառավարության նիստում կառավարությանն առընթեր պետական գույքի կառավարման վարչության պետ Արման Սահակյանը ներկայացրեց որոշման նախագիծ, ըստ որի` կառավարության որոշմամբ՝ Երևանի Մամիկոնյանց փողոց թիվ 60 հասցեում գտնվող՝ 169.700 դրամ սկզբնական արժեքով 3910.6 քառ. մետր մակերեսով շենք-շինությունները և դրանց օգտագործման ու սպասարկման համար հատկացված հողամասը կնվիրաբերվեն «Երևանի Մխիթար Հերացու անվան պետական բժշկական համալսարան» հիմնադրամին:

Վարչապետ Հովիկ Աբրահամյանն այս անգամ էլ դիտողություն արեց Արման Սահակյանին` ասելով, որ այնպես պետք է ներկայացնել նախագիծը, որ լսողներն ամեն ինչ հասկանան: Նշենք, որ վարչապետը նախկինում ևս մի քանի անգամ ակնարկել է Արման Սահակյանին, որ որոշման նախագծերը հարկավոր է հասկանալի ներկայացնել:

«Հանրակացարան են ուզում, որ բժշկական համալսարանն ունենա, որպեսզի Հնդկաստանից ուսանողները գան և կարողանան այնտեղ ապրել: Պարզ պիտի բացատրեք, որ մարդիկ իմանան: Ամեն անգամ բոլորիդ ասում եմ նույն բանը: Դե ասա, ծրագրի մասին խոսի, հիմա մարդկանց մտքներով ի՞նչ պետք է անցնի, որ ինչի՞ համար են վաճառում: Բացատրեք, որ խնդիր է դրված նախագահի կողմից, որ այդ հարցը լուծվի: Պիտի ասե՞ք, թե՞ չէ, Արմա\'ն, ես չեմ հասկանում էլի, ալարում ե՞ք խոսել»,- նեղսրտեց Հովիկ Աբրահամյանը:

Արման Սահակյանից հետո զեկուցում էր ՀՀ ԿԳ նախարար Արմեն Աշոտյանը, ով շատ հասկանալի բացատրեց որոշման նախագիծը: Վարչապետը կրկին հիշեց նախորդ զեկուցող Արման Սահակյանին: «Բա ինչո՞ւ պարոն Սահակյանն այդպես չի զեկուցում»,- ակնարկեց նա: