«Վերնիսաժ»-ի գործով փաստաբանը բողոք է գրել վերադաս դատախազին

«Վերնիսաժ»-ի մոտ մայիսի 17-ին արձակված կրակոցների համար կալանավորված Գոռ Առաքելյանին առաջադրված մեղադրանքը վերանայելու` փաստաբանի միջնորդությունը մերժվել է: Yerkir.am-ի հետ զրույցում Գ. Առաքելյանի փաստաբան Երեմ Սարգսյանն ասաց, որ մի քանի օր առաջ է ստացել միջնորդությունը մերժելու մասին որոշումը, որն էլ հենց այսօր բողոքարկել է վերադաս դատախազին:

«Հիմնավոր ներկայացրել եմ, որ առաջադրված մեղադրանքը սխալ է, սխալ է որակված արարքը»,- ասաց Ե. Սարգսյանը: Բացի վերադաս դատախազին բողոքարկելուց, իր պաշտպանյալին առաջադրված մեղադրանքը վերացնելու վերաբերյալ նա նոր միջնորդություն է ներկայացրել:

Հիշեցնենք, որ Գոռ Առաքելյանին մեղադրանք է առաջադրվել մեկից ավելի անձանց նկատմամբ սպանության փորձ կատարելու համար: Այնինչ` պաշտպանը համաձայն չէ մեղադրանքի հետ: Նա պնդում է, որ եթե անձը սպանության փորձ կատարած լիներ, ապա չէր կրակի գոտկատեղից ներքև: