ԲՀԿ-ական պատգամավորները հակասում են Ծառուկյանին

Խորհրդարանական ճեպազրույցների ժամանակ ԲՀԿ խմբակցության ներկայացուցիչները վերահաստատեցին իրենց կարծիքը`սահմանադրական փոփոխությունների հետ կապված:

ԲՀԿ խմբակցության պատգամավոր Վահե Հովհաննիսյանը նշեց, որ այսօրվա Սահմանադրությունը տալիս է հնարավորություններ, որ երկիրը բուռն զարգանա, բայց թե ինչու չի զարգանում, դա արդեն այլ հարց է: «Պարտադիր չէ փոխել կառավարման մոդելը, որ տեղի ունենան համակարգային փոփոխություններ»,- նշեց նա:

Իսկ Նաիրա Զոհրաբյանի համոզմամբ` բացարձակ պետք չեն սահմանադրական փոփոխություններ, որպեսզի տեղի ունենան Ընտրական օրենսգրքի փոփոխություն, իշխանության թևերի հավասարակշռում, ընդդիմության լիազորությունների ընդլայնում, որովհետև ցանկացած մոդել ունի իր առավելությունները և թերությունները: Հետևաբար, ըստ պատգամավորի, խնդիրը քաղաքական կամքի մեջ է, և երաշխիք չկա, որ կառավարման մոդելի փոփոխությունը կվերացնի առկա խնդիրները: «Ես առանձնապես ռոմանտիկ չեմ, չեմ փայփայում նման հույսեր: Այնպես որ` թող դեմագոգիայով չզբաղվեն նրանք, ովքեր երկրի բոլոր արատները կապում են սահմանադրական փոփոխությունների հետ»,- ասաց Նաիրա Զոհրաբյանը:

Հիշեցնենք, որ երեկ ԲՀԿ առաջնորդ Գագիկ Ծառուկյանը, անդրադառնալով սահմանադրական փոփոխություններին, ասել է. «Ես լուրջ չեմ համարում խոսել մի բանի մասին, որը դեռ չկա, հայտնի չէ: Պարզ չէ` խոսքը ինչ փոփոխությունների մասին է: Երբ կլինի փաթեթը, հայեցակարգը, այն ժամանակ ես պատրաստ կլինեմ բոլոր հարցերին պատասխանել»: