Ծառուկյանը ցանկանում է, որ չինացի գործարարները ՀՀ-ում ներդրումներ կատարեն

Շարունակվում է ԲՀԿ նախագահ Գագիկ Ծառուկյանի գլխավորած պատվիրակության այցը Չինաստանի Ժողովրդական Հանրապետություն: Այս մասին հաղորդագրություն է տարածել Ծառուկյանի մամուլի քարտուղար Իվետա Տոնոյանը:

Այս անգամ Ծառուկյանը հանդիպել է արդյունաբերության տարբեր ոլորտներ ներկայացնող` չինացի հայտնի գործարարների և համաշխարհային մեծ ճանաչում ունեցող խոշորագույն ընկերությունների ղեկավար անդամների հետ:

«Ես պատրաստ եմ դառնալ վստահության երաշխավոր, որպեսզի դուք և ձեր գործընկերները կարողանաք գալ Հայաստան և ներդրումներ կատարեք մեր երկրում ձեր ցանկացած ոլորտներում»,- հայտարարել է Ծառուկյանը՝ հավելելով, որ ինքն իր կողմից պատրաստ է անել առավելագույնը՝ օտարերկրյա ներդրողների համար Հայաստանը գրավիչ դարձնելու համար:

Չինացի ձեռնարկատերերն, իրենց հերթին, նշել են, որ հետաքրքրված են Հայաստանով և մոտ ապագայում պատրաստ են հանդես գալ կոնկրետ ծրագրերով ու նախաձեռնություններով:

Ծառուկյանը տեղեկացրել է, որ առաջիկայում պատրաստվում է Հայաստանում հայ-չինական տնտեսական ֆորում անցկացնել, որի ընթացքում չինացի գործարարները հնարավորություն կունենան ծանոթանալու Հայաստանի բիզնես միջավայրին ու հենց տեղում ստանալու իրենց հետաքրքրող բոլոր հարցերի պատասխանները: