Սուրբ Աթոռին տխրեցրել են Փարիզում ՕԽ բացման ժամանակ որոշ տեսարաններ. Վատիկան

Սուրբ Աթոռը տխրություն և ափսոսանք է հայտնել այս տարվա Օլիմպիական խաղերի բացման արարողության որոշ տեսարանների կապակցությամբ՝ ասելով, որ «հեղինակավոր միջոցառման ժամանակ, որտեղ ամբողջ աշխարհը համախմբվում է ընդհանուր արժեքներ կիսելու համար, չպետք է լինեն շատերի կրոնական համոզմունքները ծաղրող ակնարկներ»: Այս մասին գրում է vaticannews.va կայքը:

«Սուրբ Աթոռին տխրեցրել են Փարիզում Օլիմպիական խաղերի բացման արարողության ժամանակ որոշ տեսարաններ, և այն կարող է միայն միանալ վերջին օրերին հնչած ձայներին՝ ափսոսանք հայտնելու քրիստոնյաներին և այլ կրոնների հավատացյալներին հասցված վիրավորանքի համար: Հեղինակավոր միջոցառման ժամանակ, որտեղ ամբողջ աշխարհը համախմբվում է՝ կիսելու ընդհանուր արժեքները, չպետք է լինեն բազմաթիվ մարդկանց կրոնական համոզմունքները ծաղրող ակնարկներ», – ասվում է հայտարարությունում:

Սուրբ Աթոռը նաև պնդել է, որ խոսքի ազատությունը կասկածի տակ չի դրվում, սակայն այն պետք է «սահմանափակվի ուրիշների հանդեպ հարգանքով»։

Նշենք, որ Օլիմպիական խաղերի բացման արարողության դրվագներից մեկի շուրջ աղմուկը չի հանդարտվում: Խոսքն այն տեսարանի մասին է, որը, ըստ ամենայնի, ծաղրանմանակում է Լեոնարդո դա Վինչիի «Խորհրդավոր ընթրիք» նկարի՝ Քրիստոսի և նրա առաքյալների վերջին հանդիպման աստվածաշնչյան տեսարանը: