ԵՏՄ-ին Հայաստանի անդամակցության ձգձգման պատճառները գտնվում են ենթադրությունների դաշտում. ՀՀԿ-ական

ԱԺ ՀՀԿ խմբակցության պատգամավոր Աշոտ Աղաբաբյանը կարծում է, որ Հայաստանի արտաքին քաղաքական խնդիրները փոխկապակցված են այլ երկրների արտաքին քաղաքականության հետ, մասնավորապես` Ռուսաստանի կողմից  Ադրբեջանին զենք վաճառելը , Հայաստանին զսպաշապիկ հագցնելը , նաև այն  խոչընդոտները, որ իբրև թե մաքսակետ են ուզում դնել Հայաստանի ու Արցախի միջև:

Yerkir.am-ի հետ զրույցում խոսելով հայ-ադրբեջանական սահմանին տիրող լարվածության, ԵՏՄ-ին Հայաստանի անդամակցության ձգձգման մասին, Աշոտ Աղաբաբյանը ասաց. «Բոլոր հարցերը փոխկապակցված են, բոլոր երկրները իբրև ուզում են, որ ամեն ինչ լավ լինի, բայց ամենից շատ ուզում են, որ իրենց լավ լինի»:

ԱԺ ՀՀԿ խմբակցության պատգամավոր Մանվել Բադեյանն էլ նշեց, որ ԵՏՄ-ին Հայաստանի անդամակցության ձգձգման պատճառները գտնվում են ենթադրությունների դաշտում, եւ ինքը չի տիրապետում անհրաժեշտ տեղեկատվության:

«Բանակցողներին է պետք հարցնել, թե չէ ամեն ինչ կարելի է ենթադրել»,- ասաց նա: Ինչ վերաբերում է սահմանային լարվածությանը, նա կարծիք հայտնեց, որ Հայաստանը չի կարող ակտիվացնել պատասխան  գործողությունները ոչ համաչափ ձևով, որովհետև դա կնշանակի սրել իրավիճակը:

«Մենք կողմնակիցն ենք կարգավորման խաղաղ ճանապարհին, ահա ինչու ցանկանում ենք ավելորդ սրություն չմտցնել հայ-ադրբեջանական սահմանին»,- ասաց պատգամավորը: