Թուրք գիտնականը կոչ է անում քար անգամ չտեղաշարժել այն տարածքից, որում ըստ ենթադրությունների գտնվում է Նոյան տապանը

Թուրքիայում գործող Աղրը Իբրահիմ Չեչեն համալսարանի պրոռեկտոր, դոկտոր, պրոֆ․ Ֆարուք Քայան շեշտել է Արարատ լեռան փեշերին գտնված Նոյան տապանի մնացորդների պահպանման անհրաժեշտության մասին։ Պրոֆեսորը նշել է․ «Եթե այս վայրում են գտնվում Նոյան տապանի մնացորդները, ապա այստեղ չի կարելի մի քար իսկ տեղաշարժել, քանզի ապագա ուսումնասիրությունների արդյունքում ճիշտ եզրահանգման հանգելու համար ամենափոքր մանրամասնությունն անգամ կարող է շատ կարևոր լինել»։

Այդ մասին հայտնում է Akunq.net-ը՝ հիմնվելով թուրքական «Անադոլու» պետական լրատվական գործակալության հրապարակման վրա։

Աղբյուրի համաձայն՝ մինչ օրս հիշյալ համալսարանը բազմաթիվ գիտաժողովներ է կազմակերպել՝ Նոյան տապանի գտնվելու վայրի թեմայով, որոնց մասնակցել են նաև տեղացի և օտարերկրացի գիտնականներ։

Աղրը Իբրահիմ Չեչեն համալսարանի պրոռեկտորը գործակալության թղթակցի հետ զրույցում նաև հիշեցրել է, որ ըստ Աստվածաշնչի՝ Նոյան տապանը գտնվել է Արարատ լեռան վրա, և որ մինչ օրս որոշ ուսումնասիրություններ են կատարվել այդ թեմայի շուրջ։

Թուրք պրոֆեսորը նաև նշել է, որ 1945 թ․ նավի զանգված հիշեցնող մի առարկա էր գտնվել , և որ 1989 թ․ Թուրքիայի մշակույթի և զբոսաշրջության նախարարությունն այդ տարածքը բնական արգելոց էր հայտարարել։

Քայան նաև հայտնել է, որ այդ տարածքը հարկ եղածի չափ չի պահպանվում, և հատկապես «արտասահմանից ժամանող այցելուներն ու գիտնականները երբեմն առանց թույլտվության մուտք են գործում այնտեղ և լուսանկարներ անում»։ Թուրք պրոֆեսորը կարծում է, որ նախ պետք է նման մարդկանց արգելել այդ տարածք մտնել։

Համալսարանի պրոռեկտորը նաև իր մտահոգությունն է արտահայտել այն փաստի վերաբերյալ, որ այդ հատվածը փլուզման վտանգի տակ է գտնվում և նշել, թե հարկ է միջոցներ ձեռնարկել այդ վտանգը չեզոքացնելու ուղղությամբ։

Ֆարուք Քայան զրույցի վերջում նաև ընդգծել է, որ Նոյան տապանի շնորհիվ այդ վայրերում կարելի է զբոսաշրջությունը զարգացնել և հայտնել, որ դեռևս 2010 թ․ Հոնկոնգից չինացիների մի խումբ էր ժամանել, ովքեր Արարատ բարձրանալուց հետո փայտի մի քանի կտոր վերցնելով՝ վերադարձել էին և Հոնկոնգում Նոյան տապանի թանգարան բացել։

Թուրք պրոֆեսորը շեշտելով, որ Արարատ լեռը և Նոյան տապանի մնացորդները կարող են զբոսաշրջային վայր դառնալ Թուրքիայում, նշել է․ «Ներկայում միլիոնավոր զբոսաշրջիկներ են այցելում Հոնկոնգի Նոյան տապանի թանգարան։ Քանի որ Արարատը հատկապես քրիստոնյաների էական մասի համար սուրբ վայր է համարվում, և նրանք հավատում են, թե Նոյան տապանն այստեղ է գտնվում, ապա այս կողմերում ներդրումներ անելու դեպքում կարելի է զարկ տալ զբոսաշրջության զարգացմանը»։

https://www.aa.com.tr/tr/kultur-sanat/nuhun-gemisine-ait-olduguna-inanilan-alanda-tek-tas-bile-yerinden-oynatilmasin-cagrisi/1948759

Թարգմանեց Մելինե Անումյանը

Akunq.net