Ծանրամարտի կանանց Հայաստանի հավաքականը աշխարհի առաջնությանը կմասնակցի 7 ծանրորդուհիներով

Ինչպես ծանրամարտի տղամարդկանց հավաքականը, այնպես էլ կանանց ընտրանին այժմ հավաք է անցկացնում Ծաղկաձորում: Մարզաձևի Հայաստանի պաշտոնական կայքը զրուցել է կանանց հավաքականի գլխավոր մարզիչ Արտաշես Ներսիսյանի հետ:

-Պարոն Ներսիսյան, հավանաբար դուք էլ տղամարդկանց պես սկսել եք նոյեմբերի 4-ին Ալմաթիում մեկնարկելիք աշխարհի առաջնության նախապատրաստական փուլը:

-Այո, մինչև ամսի 20-ը կմնանք Ծաղկաձորում: Առաջին հավաքի հիմնական նպատակն է ուշադրություն դարձնել ընդհանուր ֆիզիկական պատրաստությանը: Այսինքն՝ վարժությունները կատարվում են ցածր քաշով, սակայն մեծ քանակով:

-Տղամարդկանց հավաքականը մինչև աշխարհի առաջնություն պատրաստվում է 6 ուսումնամարզական հավաք անցկացնել: Դուք ի՞նչ ծրագիր ունեք:

-Նույնը: Ուր տղամարդկանց հավաքականն է գնալու, ինչ ծրագրով աշխատելու է, նույն էլ մենք, ոչ մի տարբերություն: Միայն մարզման առանձնահատկությունով ենք տարբերվելու: 4 հավաք անցկացնելու ենք Հայաստանում՝ երկուական Ծաղկաձորում ու Աբովյանում, մեկը Թեոդոսիայում և վերջինը Ալմաթիում:

-Հավաքին մասնակցում է նաև Սոնա Պողոսյանը:

-Այո Սոնան, քանի որ պատրաստվում է Նանկինում կայանալիք պատանեկան օլիմպիական խաղերին, ուստի նրան ևս ֆեդերացիայի որոշմամբ՝ ընդգրկել ենք այս հավաքին: Թեպետ շատ հնարավոր է, որ նա էլ մասնակցի մեծահասակների աշխարհի առաջնությանը:

-Աշխարհի առաջնությանը ամբողջական կազմո՞վ եք մասնակցելու:

-Այո, քանի որ օլիմպիական վարկանիշային առաջնություն է, կներկայանանք 7 հոգով: Նրանցից լավագույն 4-ի արդյունքներով կձգտենք պայքարել 2 կամ 3 օլիմպիական ուղեգրերի համար:

-Իսկ առավելագույն տեղերի համար պայքարելն անիրակա՞ն է:

-Ինչու, մրցում է, ամեն ինչ հնարավոր է, կարևորը աղջիկներն կարողանան իրենց հնարավորությունների սահմանում հանդես գալ: Եթե շատերին հաջողվի տասնյակ մտնել, ուստի ամեն ինչ հնարավոր է: Բայց միևնույն ժամանակ շատ դժվար կլինի պայքարել այնպիսի զորեղ հավաքականների հետ, ինչպիսիք են Ռուսաստանը, Ղազախստանը, Չինաստանը ու ևս մի քանի ևվրապական և ասիական երկրներ: 2010 թվականին, եթե Մելինեն չվնասեր ձեռքը, ապա մենք շատ մոտ էինք 4 ուղեգիր ձեռք բերելուն:

-Ալմաթիում կայանալիք աշխարհի աառջնությունը ճիշտ է վարկանիշային է, սակայն ծանրորդուհիները, կարծում եմ, դեմ չեն լինի հերթական անգամ կանգնել պատվո պատվանդանին:

-Մեդալների հավանական թեկնածուներն են Մելինե Դալուզյանն ու Հռիփսիմե Խուրշուդյանը, սակայն երկուսն էլ այս պահի դրությամբ ունեն քաշի խնդիր: Մելինեն, որ հանդես է գալու 69 կգ քաշային կարգում, այս պահին ընդամենը կշռում է 62 կգ, իսկ Հռիփսիմեն՝ 82 կգ է, որը  գերծանր քաշայինի համար շատ փոքր քաշ է: Լոնդոնի օլիմպիական խաղերում նա 87 կիլոգրամ էր: Եթե աղջիկները քաշ հավաքեն, մեդալների հավանականությունը շատ մեծ կլինի