Նաիրիտցիները Հովիկ Աբրահամյանին «հուշել են», թե ով է ստեղծված իրավիճակի մեղավորը

Կառավարության մոտ այսօր բողոքի ցույց անող «Նաիրիտ» գործարանի ներկայացուցիչները, որոնց ընդունել ու նրանց բողոքները, պահանջներն ու տեսակետները լսել էր վարչապետ Հովիկ Աբրահամյանը, դուրս եկան շենքից վարչապետի հետ հանդիպումից հետո:

Բանագնացներից` գործարանի արհկոմի նախագահ Հրաչ Թադեւսյանը լրագրողներին տեղեկացրեց, որ վարչապետի հետ խոսել են «Նաիրիտի» հետագա ճակատագրի, աշխատակիցների աշխատավարձերի պարտքերի, «Նաիրիտի» ներկայիս վիճակի համար պատասխանատուների ու նրանց պատժելու մասին:

Լրագրողների հարցին` իսկ ո՞ւմ են նաիրիտցիները համարում ներկայիս վիճակի պատասխանատու, արհկոմի նախագահ Հրաչ Թադեւոսյանը միանշանակ պատասխանեց` նախկին կառավարության ղեկավարին: Իսկ կառավարությունը, նշեց Թադեւոսյանը, դեռ պարզում է, թե ովքեր են մեղավորները:

Ինչ վերաբերում է բողոքի ակցիայի մասնակիցների պահանջներին, վարչապետ Հովիկ Աբրահամյանը խոստացել է, որ հաջորդ շաբաթվա ընթացքում կառավարությունը նաիրիտցիների` 16 ամսվա կուտակված աշխատավարձից կվճարի մեկ աշխատավարձը, մինչեւ օգոստոսի վերջ էլ կառավարությունը վերջնականապես կվճռի «Նաիրիտի» հետագա ճակատագիրը:

Բանագնացները նաեւ կուտակված հարցերի լուծման սեփական պատկերացումներն են ներկայացրել Հովիկ Աբրահամյանին:

Բանագնացները վարչապետի հետ պայմանավորվածությունները ներկայացրեցին կառավարության շենքի առջեւ հավաքված իրենց ընկերներին: Ի դեպ, նաիրիտցիներին կա'մ մասամբ էին բավարարում կառավարության ղեկավարի պատասխանները, կա'մ չէին բավարարում…