Սանկտ Պետերբուրգում Ցեղասպանության 100-ամյա տարելիցի միջոցառումների վերաբերյալ հարցեր են քննարկվել

Հուլիսի 8-ին Սանկտ Պետերբուրգում ՀՀ գլխավոր հյուպատոս Հրայր Կարապետյանը հանդիպեց Սանկտ Պետերբուրգի Օրենսդիր Ժողովի ղեկավար Վյաչեսլավ Մակարովի հետ. տեղեկացնում է ԱԳՆ մամուլի ծառայությունը:

Հանդիպմանը մասնակցում էին նաև Սանկտ Պետերբուրգում ՀՀ գլխավոր հյուպատոսի օգնական Արտակ Գաբրիելյանը, Սանկտ Պետերբուրգում հայ համայնքի նախագահ Կարեն Մկրտչյանը, Սանկտ Պետերբուրգի Օրենսդիր Ժողովի ղեկավարի խորհրդական Վատանյառ Յագյան և Սանկտ Պետերբուրգի Օրենսդիր Ժողովի արտաքին կապերի պետ Նարգիզ Ախադովան:

Ողջունելով գլխավոր հյուպատոսին՝ Վյաչեսլավ Մակարովը պատմեց Օրենսդիր Մարմնի կառուցվածքի, կազմի, պատգամավորների աշխատանքների մասին և շնորհակալություն հայտնեց Հայաստանի իշխանություններին միջազգային ատյաններում Ռուսաստանին աջակցելու համար:

Շնորհակալություն հայտնելով ընդունելության համար՝ Սանկտ Պետերբուրգում ՀՀ գլխավոր հյուպատոս Հ. Կարապետյանը ներկայացրեց Հայաստանի ներկայիս իրավիճակը: Հանդիպման ընթացքում քննարկվեցին 2014-2015 թթ. Սանկտ Պետերբուրգում հայ համայնքի և Գլխավոր հյուպատոսության կողմից կազմակերպվելիք Հայոց ցեղասպանության 100-ամյա տարելիցի միջոցառումների վերաբերյալ հարցեր: