Մոտ 12 հազար ոստիկան կհսկի 100-ամյա տարելիցի միջոցառումների պատշաճ ընթացքը

Այսօր լրագրողների հետ զրույցում փոխոստիկանապետ Սամվել Հովհաննիսյանը ներկայացրեց տեղեկատվություն Հայոց ցեղասպանության 100-ամյա տարելիցի միջոցառումների վերաբերյալ` ոստիկանության մասով: Նա նշեց, որ ապրիլի 23-ին Մայր Աթոռ Սուրբ Էջմիածնում սրբադասման կարգին մասնակցել ցանկացող քաղաքացիները  ժամը 13:00-ին Բրազիլիայի հրապարակից` քաղաքապետարանի կողմից տրամադրած տրանսպորտային միջոցներով կարող են շարժվել Էջմիածին: Մասնավոր մեքենաները կարող են թողնել Բրազիլիայի հրապարակում, որտեղ այդ մեքենաները կլինեն  ոստիկանների հսկողության ներքո: Էջմիածնում փակ կլինեն Մաշտոցի փողոցը, Կոմիտասի հրապարակը, Արարատյան փողոցը:

Ապրիլի 23-ին առավոտից փակ կլինեն Երեւանի Մաշտոցի, Ամիրյան, Աբովյան, Թումանյան,  Նալբանդյան, Հանրապետության, Գրիգոր Լուսավորչի, Խորենացու փողոցները, Տիգրան Մեծի պողոտան` Փոքր կենտրոնի խաչմերուկներից սկսած:

Ապրիլի 23-ի Հանրապետության հրապարակ քաղաքացիները մուտք են գործելու Շահումյան հրապարակից` նախնական զննում անցնելուց հետո, և եթե մարդկանց հոսքն անցնի 50 հազարը, կփակեն մուտքը դեպի Հանրապետության հրապարակ: Ելքը Հանրապետության հրապարակից նախատեսված է Տիգրան Մեծ պողոտայով և Ամիրյան փողոցով: Աբովյան և Նալբանդյան փողոցներից մուտք և ելք չի իրականացվի:

Ապրիլի 24-ին առավոտից փակ կլինի Բաղրամյան պողոտան, կբացեն` միայն իրավիճակից ելնելով, երբ կհանդարտվի մարդկանց հոսքը: Ջահերով երթը նույնպես անցնելու է ոստիկանների ուղեկցությամբ:

Մոտ 12 հազար ոստիկան, այսօրվանից սկսած, անցել են արտակարգ ռեժիմով ծառայության: